The news is by your side.

Advertisement

پولیس فورس کے پاس اختیارات قوم کی امانت ہیں، آئی جی پنجاب پولیس

لاہور: آئی جی پنجاب پولیس عارف نواز خان کا کہنا ہے کہ پولیس فورس نے قومی و مذہبی تہواروں پر جس جذبے سے ڈیوٹی سر انجام دی وہ وقت کی اہم ضرورت ہے۔

تفصیلات کے مطابق آئی جی پنجاب پولیس کیپٹن (ر) عارف نواز خان نے کہا ہے کہ پنجاب پولیس سروس ڈلیوری کو بہتر سے بہتر بنا کر ہی عوام میں اپنا امیج بہتر کرسکتی ہے۔

انہوں نے کہا کہ تمام افسران واہلکار شہریوں کے ساتھ خوش اخلاقی اور نرم گفتاری کو اپنا شعار بنائیں تاکہ پولیس اور عوام کے درمیان باہمی اعتماد کا رشتہ مزید بہتر اور مضبوط ہوسکے۔

آئی جی پنجاب پولیس نے کہا کہ پولیس فورس کے پاس اختیارات قوم کی امانت ہیں جسے تمام افسران واہلکار بھرپور محنت ، لگن اور ایمانداری کے ساتھ مخلوق خدا کی خدمت پر استعمال کریں اور کمیونٹی پولیسنگ کے اصولوں کے مطابق اپنی پرفارمنس کو بھی بہتر سے بہتر بنائیں۔

انہوں نے کہا کہ عوام کے مسائل ان کی دہلیز پر حل کرنے کے لیے صوبہ بھر میں کھلی کچہریوں کے انعقاد میں مزید تیزی لائی جائے اور غریب، مستحق شہریوں کو درپیش مسائل کا حل ترجیحی بنیادوں پریقینی بنایا جائے۔

آئی جی پنجاب پولیس نے کہا کہ عید الاضحیٰ، جشن آزادی اور یوم سیاہ پر صوبے کے تمام اضلاع میں سیکیورٹی کے فول پروف اور بہترین انتظامات یقینی بنانے پر پولیس فورس کی تعریف کی۔

انہوں نے مزید کہا کہ محرم الحرام کے دوران بھی بھرپور محنت اور خلوص نیت سے صوبے میں امن وامان کی فضا کو برقرار رکھا جائے اور سیکیورٹی انتظامات کے حوالے سے درپیش چیلنجز کے حوالے سے ابھی سے تیاری شروع کر دی جائے۔

Comments

comments

یہ بھی پڑھیں