The news is by your side.

Advertisement

قائم علی شاہ کی عبوری ضمانت منظور

اسلام آباد: اسلام آباد ہائی کورٹ نے سندھ روشن پروگرام میں مبینہ کرپشن میں سابق وزیراعلیٰ سندھ قائم علی شاہ کی 9 دسمبر تک عبوری ضمانت منظور کرلی۔

تفصیلات کے مطابق اسلام آباد ہائی کورٹ کے جسٹس عامر فاروق اور جسٹس محسن اختر کیانی پر مشمل 2 رکنی بینچ نے سابق وزیراعلیٰ سندھ کی جانب سے ضمانت کے لیے دائر درخواست پر سماعت کی۔ قائم علی شاہ اپنے وکیل بیرسٹر قاسم نواز عباسی کے ساتھ عدالت میں پیش ہوئے۔

اسلام آباد ہائی کورٹ نے 5 لاکھ روپے کے مچلکوں کے عوض ضمانت قبل از گرفتاری 9 دسمبر تک منظور کرلی اور نیب کو نوٹس جاری کرتے ہوئے جواب طلب کرلیا۔ عدالت نے حکم دیا کہ قائم علی شاہ نیب تحقیقات کا حصہ بنیں۔

سابق وزیراعلیٰ سندھ نے 29 نومبر کو قومی احتساب بیورو کے ہاتھوں گرفتاری کے خدشے کے پیش نظر اسلام آباد ہائی کورٹ سے رجوع کیا تھا۔

یاد رہے کہ رواں سال مارچ میں بھی قائم علی شاہ نے اسی سلسلے میں اسلام آباد ہائی کورٹ سے رجوع کیا تھا اور اس وقت ان کی درخواست ضمانت قبل ازگرفتار منظور کرلی گئی تھی۔ عدالت نے سابق وزیراعلیٰ سندھ کی ضمانت 10 لاکھ روپے کے مچلکوں کے عوض منظور کی تھی۔

Comments

یہ بھی پڑھیں