اسلام آباد : اسلام آباد ہائی کورٹ نے سابق چیف جسٹس ثاقب نثار کے بیٹے کی مبینہ آڈیولیک معاملے پر طلبی کیخلاف درخواست پر سیکرٹری داخلہ ، سیکرٹری دفاع اور وزیر اعظم آفس کو 2ہفتے جواب جمع کرانے کی ہدایت کردی۔
تفصیلات کے مطابق اسلام آباد ہائی کورٹ میں سابق چیف جسٹس ثاقب نثار کے بیٹے کی مبینہ آڈیولیک معاملے پر طلبی کیخلاف درخواست پر سماعت ہوئی۔
ہائیکورٹ کے جسٹس بابر ستار نے نجم الثاقب کی درخواست پر سماعت کی، ایڈیشنل اٹارنی جنرل نے بتایا کہ اٹارنی جنرل اسلام آباد میں نہیں اس لئے کچھ وقت دیا جائے ، جس پر جسٹس بابر ستار کا کہنا تھا کہ اس معاملے کو سنجیدہ لیں اور جواب جمع کرائیں ، آپ جواب نہیں دیتے تو میں متعلقہ سیکریٹریز کو طلب کر لوں گا۔
جسٹس بابر ستار نے استفسار کیا کہ سرولنس کرنی ہے یا نہیں ؟ کو ڈیٹا آئے گا اس کااسٹیٹس کیاہو گا ؟ آپ کے تو وزیراعظم ہاؤس سے ڈیٹا ریلیز ہو گیا۔
اسلام آباد ہائی کورٹ نے سابق چیف جسٹس ثاقب نثارکےبیٹےکی پارلیمانی کمیٹی طلبی سے روکنے کے حکم میں 18 ستمبر تک توسیع کرتے ہوئے سیکرٹری داخلہ ، سیکرٹری دفاع اور وزیر اعظم آفس کو 2 ہفتے جواب جمع کرانے کی ہدایت کردی۔
عدالت نے سیکریٹری داخلہ ،سیکریٹری دفاع آئندہ سماعت پرذاتی حیثیت میں طلب کرلیا اور کیس کی مزید سماعت 18 ستمبر تک ملتوی کردی۔
