اسلام آباد: اسلام آباد ہائی کورٹ نے مندر کی تعمیر کے خلاف دائر درخواستوں پر تفصیلی فیصلہ جاری کر دیا۔
تفصیلات کے مطابق اسلام آباد ہائی کورٹ کے جسٹس عامر فاروق نےمندر سے متعلق 5 صفحات پر مشتمل تفصیلی فیصلہ جاری کردیا جس میں کہا گیا ہے کہ تینوں درخواستوں کو نمٹایاجاتا ہے۔
عدالت کی جانب سے دینے جانے والے فیصلے میں کہا گیا ہے کہ مندر کی فنڈنگ کا معاملہ اسلامی نظریاتی کونسل کو بھیجا جا چکا ہے، اس معاملے میں عدالت کوئی مداخلت نہیں کرنا چاہتی۔
تفصیلی فیصلے میں کہا گیا ہے کہ اگر پٹیشنر کو تحفظات ہیں تو وہ عدالت سے رجوع کرسکتا ہے،سی ڈی اے نے مندر کے لیے الاٹمنٹ جاری کی ہے وہ درست ہے۔
یاد رہے کہ دو روز قبل وفاقی وزیر برائے مذہبی امور پیر نور الحق قادری کا کہنا ہے کہ وفاقی دارالحکومت میں مندر کی تعمیر کا فیصلہ اسلامی نظریاتی کونسل کرے گی۔
نور الحق قادری کا کہنا تھا کہ ابھی تک اسلام آباد میں مندر کے لیے حکومت نے فی الحال کسی قسم کے فنڈز نہیں دیے اور اس سے متعلق فیصلہ بھی وزیراعظم عمران خان ہی کریں گے۔
