The news is by your side.

Advertisement

اسلام آباد: ہائی کورٹ کا شہر کے تمام راستوں سے کنٹینرز ہٹانے کا حکم

اسلام آباد: اسلام آباد ہائی کورٹ نے تحریک انصاف کی درخواست پر اسلام آباد کے تمام داخلی اور خارجی راستوں سے کنٹینرز ہٹانے اور کسی کو گرفتار نہ کرنے کا حکم دے دیا۔

تفصیلات کے مطابق اسلام آباد ہائی کورٹ کے جسٹس شوکت عزیز صدیقی نے تحریک انصاف کے کارکنان کی گرفتاری کے خلاف درخواست کی سماعت کی۔

اپنے ریمارکس میں جسٹس شوکت عزیز صدیقی کا کہنا تھا کہ تحریک انصاف والوں کا سب سے بڑا مسئلہ یہ ہے کہ کسی کی سنتے نہیں۔ انہوں نے برہمی کا اظہار کرتے ہوئے کہا کہ کل والےآرڈر پر تحریک انصاف نے ججز اور عدالت کی کردار کشی شروع کردی۔

اسلام آباد میں ایک بار پھر دفعہ 144 نافذ *

جسٹس شوکت عزیز صدیقی نے کہا کہ جب عدالت کوئی حکم دیتی ہے تو اس پرعملدر آمد کروانا بھی جانتے ہیں۔ انہوں نے دریافت کیا کہ آپ شہر بند کریں گے یا پرامن احتجاج کریں گے؟ جواب میں تحریک انصاف کے وکیل نے کہا کہ ہم عدالت کا احترام کرتے ہیں اور کل والے حکم کو من و عن مانتے ہیں۔

جسٹس شوکت عزیز نے پولیس کو گرفتار کارکنوں کی فہرست 31 اکتوبر کو عدالت میں پیش کرنے کا حکم دیتے ہوئے اسلام آباد کی سڑکوں سے کنٹینر ہٹانے کا حکم بھی دے دیا البتہ کوئی جرم کا مرتکب ہو تو اس کو گرفتار کیا جائے۔ عدالت کا کہنا تھا کہ 31 اکتوبر تک کوئی کنٹینر نہیں لگے گا۔

واضح رہے کہ کل بھی اسلام آباد ہائی کورٹ نے تحریک انصاف اور ضلعی انتظامیہ کو شہر سیل کرنے سے روک دیا تھا۔ عدالت نے سیکریٹری داخلہ کو حکم دیا تھا کہ وفاقی دارالحکومت میں کوئی کنٹینر نہیں لگے گا۔ عدالت کی جانب سے ہدایت کی گئی کہ دھرنے کے لیے پریڈ گراؤنڈ کو مختص کر کے نوٹیفیکیشن جاری کیا جائے۔

Comments

comments

یہ بھی پڑھیں