The news is by your side.

Advertisement

آصف علی زرداری کی نااہلی کے لیے درخواستوں پرسماعت آج ہوگی

اسلام آباد: پیپلزپارٹی کے شریک چیئرمین آصف علی زرداری کی نا اہلی کے لیے اسلام آباد ہائی کورٹ میں درخواستوں پر سماعت آج ہوگی۔

تفصیلات کے مطابق اسلام آباد ہائی کورٹ میں چیف جسٹس اظہرمن اللہ کی سربراہی میں آصف علی زرداری کی نا اہلی کے لیے تحریک انصاف کی درخواستوں پرسماعت آج ہوگی۔

تحریک انصاف کے رہنما عثمان ڈار اور خرم شیر زمان کی طرف سے دائر درخواستوں میں آصف علی زرداری کی بطور پارٹی سربراہ اور رکن قومی اسمبلی تاحیات نا اہلی کی استدعا کی گئی ہے۔

اسلام آباد ہائی کورٹ میں دائر درخواستوں میں موقف اختیار کیا گیا ہے کہ آصف علی زرداری نے اپنے اثاثے چھپائے، اس لیے وہ صادق اور امین نہیں رہے اور رکن اسمبلی بننے کے اہل نہیں ہیں، انہیں آرٹیکل 62 ون ایف کے تحت نا اہل قرار دیا جائے۔

یاد رہے گزشتہ روز چیف جسٹس اسلام آباد ہائی کورٹ نے آصف زرداری کی نااہلی کے لیے درخواستوں پر رجسٹرار کے اعتراضات ختم کرتے ہوئے کیس ابتدائی سماعت کے لیے مقرر کیا تھا اور حکم دیا تھا رجسٹرار آفس دونوں درخواستوں کو نمبر لگا دیں۔

چیف جسٹس اسلام آباد ہائی کورٹ نے عثمان ڈار اور خرم شیر زمان کے وکیل سے کہا تھا سیاسی درخواست عدالت لے کر کیوں آتے ہیں ؟ درخواست کا متعلقہ فورم الیکشن کمیشن ہے، سیاسی لڑائی سیاسی فورم اور پارلیمنٹ میں لڑنی چاہیے۔ عدالت میں متعدد کیسز زیر التوا ہیں۔

Comments

comments

یہ بھی پڑھیں