The news is by your side.

Advertisement

‘پاکستان بہت جلد خود این 95 ماسک بنانے کے قابل ہو جائے گا’

ننکانہ صاحب : وفاقی وزیر داخلہ اعجاز شاہ کا کہنا ہے کہ جولائی کے پہلے ہفتے میں کورونا کا عروج ہوگا ، پاکستان میں کورونا سے زیادہ غربت کا ڈر ہے، ہم بہت جلد خود این95ماسک بنانے کے قابل ہو جائیں گے۔

تفصیلات کے مطابق وفاقی وزیر داخلہ اعجاز شاہ کی زیر صدارت ٹائیگرزفورس کا اجلاس ہوا، اعجاز شاہ نے کہا کہ وزیر اعظم کو اپنے عوام کی بہت فکر ہے، لوگ ہدایت پر عمل کررہےہیں، ٹائیگرز قومی فرض سمجھتےہوئےاپنی ذمہ داریاں ادا کریں، ٹائیگرز کا کردار مکمل طور پر غیر سیاسی ہوگی، موجودہ صورتحال میں ٹائیگرز فورس کا کردار بہت اہم ہے۔

وفاقی وزیر داخلہ کا کہنا تھا کہ کورونا کے خاتمے کیلئے ہر ایک کو اپنا کردار ادا کرنا ہوگا، پاکستان میں کورونا سے زیادہ غربت کا ڈر ہے، 20نکاتی ایجنڈا علما کی مشاورت سے طے کیا گیا ، علماکرام حکومتی ہدایات پرعملدرآمدکیلئے اپنا کردار ادا کریں، مذہبی تہواروں پر حکومتی ہدایات پر عملدرآمد کرنے کی ضرورت ہے۔

اعجاز شاہ نے کہا کہ ضلعی افسران بلا امتیاز حکومتی ہدایات پر عمل درآمد کرائیں، ضلعی انتظامیہ ٹائیگرز فورس کے استعمال کیلئےحکمت عملی وضع کرے، وزیراعظم لاک ڈاؤن کے نقصانات سے مکمل آگاہ ہیں، پاکستان بہت جلد خود این95ماسک بنانے کے قابل ہو جائے گا۔

کورونا کی صورتحال کے حوالے سے ان کا کہنا تھا کہ جولائی کے پہلے ہفتے میں کورونا کا عروج ہوگا، پاکستانیوں کی اکثریت مسائل سے دوچار ہے۔

سندھ حکومت پر تنقید کرتے ہوئے وفاقی وزیر داخلہ نے کہا کہ سندھ میں ایک ارب تقسیم کئے گئے پتہ نہیں کن کو پیسے ملے، ان حالات میں بھی لوگ کرپشن سے باز نہیں آرہے۔

Comments

یہ بھی پڑھیں