راولپنڈی: تحریک انصاف کے چیئرمین عمران خان نے جاوید لطیف کے سماجی بائیکاٹ کا اعلان کردیا۔ عمران خان کا کہنا ہے کہ جہاں جاوید لطیف مدعو ہوں گے وہاں ہمارا کوئی رکن نہیں جائے گا۔
تفصیلات کے مطابق تحریک انصاف کے رہنما مراد سعید اور ن لیگ کے جاوید لطیف کے درمیان لڑائی پر چیئرمین تحریک انصاف عمران خان نے سخت فیصلہ لے لیا۔
سماجی رابطوں کی ویب سائٹ ٹوئٹر پر اپنے ٹوئٹ میں عمران خان کا کہنا تھا کہ تحریک انصاف کا کوئی نمائندہ ایسے کسی بھی ٹی وی شو میں شرکت نہیں کرے گا جس میں جاوید لطیف کو بلایا گیا ہو۔
انہوں نے کہا کہ ایسے کسی عوامی اجتماع میں بھی تحریک انصاف کا کوئی رکن یا لیڈر شرکت نہیں کرے گا جہاں جاوید لطیف کو مدعو کیا گیا ہوگا۔
No PTI rep will go on any TV chat show where Jawed Latif is invited. In any civilised country he would be banned from all public forums
— Imran Khan (@ImranKhanPTI) March 10, 2017
Nor will our party members & leaders attend any public forum event where Jawed Latif is invited.
— Imran Khan (@ImranKhanPTI) March 10, 2017
عمران خان کا کہنا تھا کہ کسی بھی مہذب معاشرے میں ایسی غیر اخلاقی حرکات کرنے والے افراد پر عوامی اجتماعات میں آنے پر پابندی لگا دی جاتی ہے۔
انہوں نے مراد سعید کے خلاف بیہودہ زبان استعمال کرنے کی سخت الفاظ میں مذمت بھی کی ہے۔
یاد رہے کہ گزشتہ روز قومی اسمبلی کے اجلاس میں عمران خان کے بیان کو غداری قرار دینے پر تحریک انصاف اور ن لیگ کے کارکنان میں تلخ کلامی ہوگئی تھی۔
بعد ازاں اجلاس سے باہر آنے کے بعد رکن تحریک انصاف مراد سعید اور ن لیگی رکن جاوید لطیف آپس میں گتھم گتھا ہوگئے تھے۔
