The news is by your side.

Advertisement

پہلا ون ڈے: پاکستان نے زمبابوے کو 201 رنز سے شکست دے دی

بلاوایو: پہلے ون ڈے میچ میں پاکستان نے زمبابوے کو 201 رنز سے شکست دے دی، امام الحق کو شاندار سنچری اسکور کرنے پر میچ کا بہترین کھلاڑی قرار دیا گیا۔

تفصیلات کے مطابق پہلے ون ڈے میچ میں زمبابوے نے ٹاس جیت کر پہلے فیلڈنگ کا فیصلہ کیا جو غلط ثابت ہوا، امام الحق اور فخر زمان نے شاندار اوپننگ شراکت قائم کی، قومی ٹیم نے 308 رنز بنائے، ہدف کے تعاقب میں زمبابوے کی ٹیم 107 رنز پر ڈھیر ہوگئی۔

زمبابوے کے صرف چار کھلاڑی ڈبل فگر میں داخل ہوسکے، ریان مرے نے سب سے زیادہ 32 رنز اسکور کیے، چبھابا کو 20 رنز پر حسن علی نے کلین بولڈ کیا، مساکڈزا 21 رنز بنا کر فہیم اشرف کی گیند پر آؤٹ ہوئے، ٹریپانو 12 رنز بناسکے انہیں شاداب خان نے پویلین روانہ کیا، زمبابوے کے دیگر کھلاڑی خاطر خواہ کارکردگی دکھانے میں ناکام رہے۔

پاکستان کی جانب سے لیگ اسپنر شاداب خان نے 4 کھلاڑیوں کو پویلین کی راہ دکھائی، فہیم اشرف اور عثمان شنواری نے دو، دو وکٹیں حاصل کیں، حسن علی اور محمد عامر نے ایک، ایک وکٹ حاصل کی۔

قبل ازیں پاکستان نے اننگز کا آغاز کیا تو فخر زمان اور امام الحق نے شاندار بیٹنگ کا مظاہرہ کیا پاکستان کی پہلی وکٹ 113 رنز پر گری جب فخر زمان 60 رنز بنا کر آؤٹ ہوئے، امام الحق نے شاندار سنچری اسکور کی وہ 128 رنز بنا کر پویلین روانہ ہوئے، بابر اعظم کو 30 رنز پر مساکڈزا نے آؤٹ کیا۔

شعیب ملک 22 گیندوں پر 22 رنز بنائے اور ٹریپانو کی گیند پر آؤٹ ہوئے، آصف علی نے 25 گیندوں پر 46 رنز کی جارحانہ اننگز کھیلی، ان کی اننگز میں 2 چھکے اور 4 چوکے شامل تھے، انہیں چھتارا نے آؤٹ کیا۔

فہیم اشرف بغیر کوئی رن بنائے پویلین لوٹ گئے، کپتان سرفراز احمد 13 رنز بنا کر ناٹ آؤٹ رہے، حسن علی بھی بغیر کوئی رن بنائے آؤٹ ہوئے، شاداب خان 2 رنز بنائے۔

زمبابوے کی جانب سے چھتارا، ٹریپانو، نے دو، دو کھلاڑیوں کی پویلین کی راہ دکھائی، مساکڈزا، روچی نے ایک، ایک وکٹ حاصل کی۔

دونوں ٹیموں کے درمیان دوسرا ون ڈے 16 جولائی، تیسرا 18 جولائی، چوتھا 20 جولائی جبکہ پانچواں اور آخری ون ڈے میچ 22 جولائی کو کھیلا جائے گا، میچ پاکستانی وقت کے مطابق سوا بارہ بجے شروع ہوگا۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک’پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں