The news is by your side.

Advertisement

وزیرِ اعظم سے کل آئی ایم ایف چیف کرسٹینا لگارڈ ملاقات کریں گی: فواد چوہدری

اسلام آباد: وفاقی وزیرِ اطلاعات نے کہا ہے کہ وزیرِ اعظم عمران خان سے کل آئی ایم ایف کی چیف کرسٹینا لگارڈ اہم ملاقات کریں گی۔

تفصیلات کے مطابق برطانوی نیوز ایجنسی کو انٹرویو دیتے ہوئے وزیرِ اطلاعات نے کہا کہ انٹرنیشنل مانیٹری فنڈ کی سربراہ کرسٹینا لگارڈ کل وزیرِ اعظم عمران خان سے ملاقات کریں گی۔

مسئلہ آئی ایم ایف نہیں ہے، بلکہ مانیٹری فنڈ کی شرائط کا ہے۔

وفاقی وزیر اطلاعات

فواد چوہدری نے بتایا کہ یہ ملاقات وزیرِ اعظم کے دورۂ یو اے ای کے دوران ہوگی۔

وفاقی وزیرِ اطلاعات نے کہا کہ ملاقات میں آئی ایم ایف کو پاکستان کے مؤقف سے آگاہ کیا جائے گا۔ نیوز ایجنسی کے مطابق وزیرِ اطلاعات فواد چوہدری اور وزیرِ خزانہ اسد عمر بھی عمران خان کے ہم راہ جائیں گے۔

فواد چوہدری کا کہنا تھا کہ مسئلہ آئی ایم ایف نہیں ہے، بلکہ مانیٹری فنڈ کی شرائط کا ہے، ہم ایسی شرائط نہیں چاہتے جن سے ترقی کا عمل متاثر ہو۔

وزیرِ اطلاعات کا یہ بھی کہنا تھا کہ حکومت ایسی ڈیل چاہتی ہے جس سے مختصر اہداف حاصل کرنے میں مدد ملے۔

یہ بھی پڑھیں:  وزیرِ اعظم عمران خان کل ایک روزہ دورے پر دبئی جائیں گے

خیال رہے کہ کل وزیرِ اعظم عمران خان ایک روزہ دورے پر دبئی جا رہے ہیں، انھیں شیخ محمد بن راشد المکتوم نے دورے کی دعوت دی ہے۔

دبئی دورے کے موقع پر وزیرِ اعظم عمران خان متحدہ عرب امارات کی قیادت کے ساتھ ملاقاتیں کریں گے، اور ورلڈ گورنمنٹ سمٹ سے بھی خطاب کریں گے، وزیرِ اعظم عالمی حکومتی سربراہی اجلاس کے عالمی مقررین میں شامل ہیں۔

Comments

comments

یہ بھی پڑھیں