اسلام آباد : آئی ایم ایف مشن کے سربراہ ناتھن پورٹر کا کہنا ہے آئی ایم ایف فنانسنگ پروگرام کی میعاد ختم ہونے سے پہلے بورڈ اجلاس کیلئے پاکستانی حکام سے رابطے میں ہیں۔
تفصیلات کے مطابق آئی ایم ایف مشن کے سربراہ ناتھن پورٹر نے غیرملکی میڈیا سے گفتگو کرتے ہوئے کہا کہ آئی ایم ایف مشن پاکستانی حکام سے رابطے میں ہے اور فنانسنگ پروگرام کی میعاد ختم ہونے سے پہلے میٹنگ کی راہ ہموارکر رہے ہیں۔
ناتھن پورٹر کا کہنا تھا کہ پاکستانی حکام سے بات چیت میں مالی سال 2024 کے بجٹ پر توجہ مرکوز کی جائے گی۔
آئی ایم ایف مشن کے سربراہ نے بتایا کہ میٹنگ غیر ملکی زرمبادلہ کی مارکیٹس کی بحالی اورآئی ایم ایف معاہدے کے مطابق مالی سال دو ہزار تیئیس چوبیس کے بجٹ کی منظوری اور بیرونی فنانسنگ کے انتظام کا جائزہ لیا جائے گا۔
ان کا مزید کہنا تھا کہ پاکستان کے ساتھ آئی ایم ایف پروگرام کی میعاد جون کے آخر میں ختم ہو رہی ہے، آئی ایم ایف قرض پروگرام کے اہداف پر پاکستانی حکام سے بات چیت ہوگی جبکہ پاکستان کیلئے مناسب فنانسنگ کے انتظامات بھی بات چیت کاحصہ ہوں گے۔
خیال رہے آئی ایم ایف کےنویں جائزے پرعملے کی سطح کامعاہدہ نومبرسےتاخیر کا شکار ہے ، پاکستان میں عملے کی سطح کے آخری مشن کو 100 سے زائد دن گزر چکے ہیں، جو کہ 2008 کے بعد اس طرح کی سب سے طویل تاخیر ہے۔
