عالمی مالیاتی ادارے آئی ایم ایف نے پاکستان پر بینظیر انکم سپورٹ کے علاوہ بھی مزید سماجی پروگرام چلانے پر زور دیا ہے۔
اے آر وائی نیوز کے مطابق عالمی مالیاتی ادارے نے کہا ہے کہ پاکستان کو کمزور طبقے کے لیے سماجی تحفظ کے زیادہ اقدامات کرنے چاہئیں اور اس کے لیے بینظیر انکم سپورٹ کے علاوہ مزید سماجی پروگرام چلانے کی مسلسل کوششیں کرنی چاہئیں۔
آئی ایم ایم کا کہنا ہے کہ بینظیر انکم سپورٹ بہترین میکنزم کے ساتھ فوری مدد دینے والا پروگرام ہے تاہم پروگرام میں تقسیم کے طریقہ کار اور شفافیت کو بہتر بنانے کی گنجائش ہے۔ اس پروگرام کے انتظامی ڈھانچے کو مزید بہتر کیا جانا چاہیے۔
عالمی مالیاتی ادارے کا یہ بھی کہنا ہے کہ کمزور طبقے کیلیے محفوظ بجلی اور گیس ٹیرف سلیب جاری رہنا چاہیے۔
آئی ایم ایف کے مطابق رواں مالی سال ستمبر میں صحت اور تعلیم کے اخراجات کا ہدف پورا کر لیا گیا تاہم نگراں حکومت محدود صلاحیت کے باعث دسمبر کا ہدف پورا نہیں کر سکی۔ منتخب حکومت مالی سال کےآخرتک سماجی تحفظ کے اخراجات جاری رکھے۔
