ابوظبی : اماراتی ریاست نے ٹیکنالوجی کے میدان میں ایک انقلاب برپا کردیا، اب اقامہ بنوانے کےلیے 40 منٹ سے زیادہ وقت نہیں لگے گا۔
تفصیلات کے مطابق متحدہ عرب امارات کی اسمارٹ ریاست دبئی کے حکام نے ٹیکنالوجی میدان میں ایک زبردست اقدام اٹھالیا جس کے بعد تارکین وطن منٹوں میں منٹوں میں دبئی کا اقامہ حاصل کرسکتے ہیں، یہ کام دبئی الآن (دبئی اب) ایپلی کیشن کے ذریعے کیا جائے گا۔
دبئی حکام نے میڈیا کو بتایا کہ دبئی میں اقامہ اور تارکین وطن کے ادارے کے تعاون و اشتراک سے آن لائن اقامے کا اجرا شروع کردیا گیا ہے، تارکین اسمارٹ موبائل کے ذریعے سرکاری اداروں سے اپنے معاملات نمٹانے لگے ہیں۔
غیر ملکی خبر رساں ادارے کا کہنا تھا کہ آن لائن اقامے کے اجراء کی منظوری کےلیے 30 منٹ جبکہ اجرا میں صرف 10 منٹ لگ رہے ہیں۔
دبئی میں تارکین اور اقامہ ادارے کے ڈائریکٹر جنرل میجر جنرل محمد احمد المری کا کہنا تھا کہ اقامے کا اجرا ، توسیع اور ترمیم نیز نقل کفالہ (ٹرانسفر اسپانسر شپ) سمیت تمام کام آن لائن انجام دے رہے ہیں۔
ان کا کہنا تھا کہ اقامے اور درخواستیں منسوخ کرنے کا عمل بھی اسمارٹ چینلز کے ذریعے کیا ہورہا ہے۔
ڈائریکٹٹر جنرل کا کہنا تھا کہ یہ کام دبئی اسمارٹ کے تعاون سے انجام دیا جارہا ہے اور ایپلی کیشن کی مدد سے ہی یہ معلوم کیا جارہا ہے کہ تارکین وطن کا ویزہ موثر ہے یا نہیں اور اس ایپلی کیشن کے ذریعے تارکین وطن اپنے بچوں، والدین اور بیوی کے اقاموں کی تجدید بھی اسی ایپ کے ذریعے کریں گے۔
