کراچی: تعلیم کی اہمیت جس شخص کی سمجھ میں آجائے پھر وہ اس کے حصول میں آنے والی رکاوٹوں کو دور کرنے کے لیے ہر قسم کے چیلنج کا سامنا کرتا ہے۔
تعلیم انسان کو غربت کے اندھیروں سے نکال کر ترقی کی راہ پر گامزن اور معاشرے کو اچھا انسان فراہم کرتی ہے اس لیے جہالت کے اندھیروں سے لوگوں کو نکالنے کے لیے ناخواندگی کے خلاف اقدامات جاری ہیں۔
ہمارے اردگرد تین اقسام کے لوگ بستے ہیں جس میں سے ایک طبقہ ایسا ہے جن کے پاس دولت کے انبار ہیں اور وہ اسی حساب سے اپنی زندگیاں گزارتے ہیں جبکہ دوسرا متوسط طبقہ جو جائز ضروریات پوری کرتے ہوئے اپنی زندگی کو گزارتا ہے اور تیسرا طبقہ ایسا ہے جو معاشی تنگ دستی کی وجہ سے کئی مصائب کا شکار رہتا ہے اور جائز خواہشات بھی پوری نہیں کرپاتا۔
عام طور پر تیسرے یعنی غریب طبقے میں پیدا ہونے والے بچے دیگر دو طبقات کی طرح زندگی کو بھرپور یا اچھے طریقے سے نہیں گزار پاتے، جیسے اسکول کے لیے وین کا کوئی انتظام اور پرائیوٹ کی جگہ سرکاری اسکول میں تعلیم حاصل کرنا وغیرہ شامل ہیں۔
انٹرنیٹ پر شیئر ہونے والی تصویر کراچی کے علاقے میں واقع یونیورسٹی روڈ کی ہے جس میں دیکھا جاسکتا ہے کہ کچرا اکٹھا کرنے والی گاڑی میں ایک بچہ اسکول یونیفارم پہنے بیگ لیے بیٹھا ہوا ہے۔
مذکورہ تصویر کو دیکھ کر اندازہ ہوتا ہے کہ بچہ اپنے اہل خانہ کے کسی سربراہ کے ہمراہ اسکول کی چھٹی کے بعد گھر جارہا ہے، یہ تصویر انٹرنیٹ پر شیئر ہوتے ہی مقبول ہوگئی۔
صارفین نے بچے کی ہمت اور گاڑی چلانے والے شخص کے اقدام کو بے حد سراہا اور دیگر والدین سے گزارش کی کہ وہ بھی تعلیم کی اہمیت کو سمجھتے ہوئے اسے عام کریں۔
