اسلام آباد : تحریک انصاف کے رہنما شاہ محمود قریشی نے عمران خان کی پریس کانفرنس سے قبل آنے والی کال سے متعلق جواب دینے سے انکار کردیا۔
تفصیلات کے مطابق پاکستان تحریک انصاف کے وائس چیئرمین شاہ محمود قریشی نے بی بی سی سے گفتگو کرتے ہوئے کہا کہ پی ٹی آئی سے جڑی ہر بات، بیان اور پریس کانفرنس عوام کی دلچسپی کا سبب بن جاتی ہے۔
عمران خان کی پریس کانفرنس سے قبل موصول ہونے والی کال سے متعلق سوال پر شاہ محمود قریشی کا کہنا تھا کہ کال کس کی تھی نہیں بتاسکتا۔
آزادی مارچ کے حوالے سے ان کا کہنا تھا کہ ہمارا کسی ادارے سے جھگڑا نہیں ، ہم تو ملک بچاؤ ،فوری انتخابات کراؤکا مطالبہ کر رہے ہیں۔
تحریک انصاف کے وائس چیئرمین نے کہا کہ ہماری جماعت یہ سمجھتی ہے کہ جلد انتخابات ستمبر کے آخر اور اکتوبر کے آغاز میں منعقد کرایا جاسکتا ہے ، الیکشن کمیشن نے بھی یہ تصدیق کی ہے کہ اس ٹائم لائن کے اندر جلد انتخابات ممکن ہیں۔
ان کا کہنا تھا کہ جلد انتخابات کی راہ میں سابق صدر آصف علی زرداری رکاوٹ ہیں، جو یہ سمجھتے ہیں کہ انتخابات کی صورت میں ان کی جماعت کو اندرون سندھ کے علاوہ کہیں سے کچھ حاصل نہیں ہوگا۔
شاہ محمود قریشی نے کہا آصف زرداری چاہتے ہیں کہ مسلم لیگ ن اقتدار میں رہے اور مشکل فیصلے بھی کرے، جس سے اس کی ساکھ متاثر ہو، جبکہ پیپلز پارٹی بغیر کسی سیاسی نقصان کے شریک اقتدار بھی رہے اور بعد میں آنے والے انتخابات میں اپنے لیے رعایتیں بھی حاصل کرسکے۔
