لاہور : چیئرمین تحریک انصاف عمران خان کی زیر صدارت اجلاس میں عام انتخابات،اعظم سواتی تشدد کیس،ارشدشریف قتل کیس کوشدت سے اٹھانےپر اتفاق کرلیا گیا۔
تفصیلات کے مطابق چیئرمین تحریک انصاف عمران خان کی زیر صدارت زمان پارک میں مشاورتی اجلاس میں اہم فیصلے کئے گیے۔
اجلاس میں عمر سرفراز چیمہ، مونس الہٰی ،راجہ بشارت، مصدق عباسی سمیت دیگر رہنما شریک ہوئے۔
عمران خان کی زیر صدارت اجلاس میں عام انتخابات،اعظم سواتی تشدد کیس،ارشد شریف قتل کیس اور سائفر کے معاملے کو مزید شدت سے اٹھانے پر اتفاق کیا گیا۔
ذرائع کا کہنا ہے کہ عوامی سطح، الیکٹرانک میڈیا ،سوشل میڈیا پر معاملات کا پر چار زور و شور سے کیا جائے گا۔
اجلاس میں کہا گیا کہ تحریک انصاف کے ارکان اسمبلی حلقوں میں پارٹی بیانیے کو گھر گھر پہنچائیں گے۔
تحریک انصاف نے ملک میں ہوشربا مہنگائی، حکومتی ناکام معاشی پالیسیوں کو بھی اجاگر کرنے پر اتفاق کیا اور حکومت کیخلاف جاری تحریک کو یوسی کی سطح پر لے جانے کا بھی فیصلہ کیا گیا۔
ذرائع نے بتایا کہ حقیقی آزادی مارچ پنڈی کیلئے پنجاب بھر کی یوسی کو بھی ٹاسک دئیے جائیں گے اور حکومت کو عام انتخابات پر مجبور کرنے کے لیے عوامی دباؤ مزید بڑھایا جائے گا۔
اس سلسلے میں راولپنڈی میں 15سے20 لاکھ لوگ لانے کیلئےکمیٹیاں تشکیل دی جائیں گی اور کمیٹیوں کی کارکردگی کی رپورٹ عمران خان کو روزانہ کی بنیاد پر دی جائے گی۔
