سعودی عرب کی جانب سے لگائی جانے والی سفری پابندی کے بعد پی آئی اے کی پاکستانیوں کی وطن واپسی کے لیے پروازیں جاری ہیں۔
پی آئی اے اسٹیشن مینجر ریاض نسیم احمد نے اے آر وائی نیوز سے گفتگو کرتے ہوئے بتایا کہ 15 ہزار سے زائد مسافر سعودی عرب سے پاکستان پہنچے گے۔
انہوں نے بتایا کہ پاکستانیوں کو وطن واپس لانے کے لیے پی آئی اے کے خالی طیارے ریاض پہنچ رہے ہیں جن کے ذریعے مسافروں کو وطن واپس لایا جائے گا۔
مینجر ریاض احمد نے کہا کہ ایک ہفتے میں 2500 سے زائد مسافر ریاض سے پاکستان کے لئے روانہ ہو ں گے۔
ترجمان پی آئی اے کا کہنا ہے کہ مسافروں کی آسانی کیلئے پی آئی اے کا سعودی عرب آپریشن جاری رہے گا۔ سعودی عرب سے پاکستان آنے والے مسافروں کو واپس لانے کیلئے پروازیں جاری رکھی جائیں گی۔
ترجمان پی آئی اے کے مطابق جن مسافروں کی پاکستان تا سعودی عرب پروازوں میں بکنگ تھی ان کی بکنگز پابندی کے خاتمے تک ملتوی کی جارہی ہیں، پابندی ختم ہوتے ہی تمام بکنگز کو پہلی پروازوں پر بحال کردیا جائے گا۔
