اسلام آباد: وزیراعظم عمران خان نے ملکی اقتصادی سفارتکاری کے فروغ سے متعلق اہم فیصلے کرتے ہوئے سرمایہ کاروں کو ممکنہ سہولتیں دی فراہم کرنے کی ہدایات دی ہیں۔
تفصیلات کے مطابق وزیراعظم عمران خان کی زیرصدارت حکومتی معاشی ٹیم کا اجلاس ہوا جس میں اقتصادی سفارتکاری کیلئےاکنامک آؤٹ ریچ اپیکس کمیٹی کےقیام کا فیصلہ کیا گیا۔
معاون خصوصی ڈاکٹر معیدیوسف کو کمیٹی کا فوکل پرسن مقرر کیا گیا ہے، متعلقہ وزارتوں، صوبائی محکموں و اداروں میں کوآرڈی نیشن کیلئے اقدامات کیے جائیں گے۔
اجلاس میں وزیراعظم کو اقتصادی سفارتکاری کا جامع روڈ میپ پیش کیاگیا اور ملکی پوٹیشنل، درپیش چیلنجز اور قابو سے متعلق روڈمیپ پر مشاورت مکمل کی گئی۔
اس موقع پر وزیراعظم کا کہنا تھا کہ اقتصادی سفارتکاری کافروغ وقت کی اہم ضرورت ہے، اقتصادی سفارتکاری سے دیگر ممالک سے تعلقات مزید مستحکم ہوں گے۔
وزیراعظم نے کہا کہ معاشی میدان میں صلاحیت سے بھی بھرپور فائدہ اٹھایا جا سکےگا، پاکستانی سفارتخانے اقتصادی سفارتکاری کےفروغ پرتوجہ دیں اور چیئرمین سرمایہ کاری بورڈ سرمایہ کاروں کو ممکنہ سہولیات فراہم کریں۔
