ریاض: سعودی عریبین اتھارٹی (ساما) نے بینکوں میں مالیاتی فراڈ سے بچنے کے لیے اسپیشل گائیڈ بک جاری کر دی۔
سعودی عریبین اتھارٹی (ساما) کی جانب سے اسپیشل گائیڈ بک جاری کی گئی ہے جس میں تمام بینکوں پر پابندی لگائی گئی ہے کہ وہ اپنے یہاں فراڈ کے سدباب کے لیے انتظامی یونٹ قائم کریں جو ہر طرح کے مالی فراڈ سے پیدا ہونے والے مسائل کے حل پیش کرنے کے ساتھ فراد کی روک تھام میں موثر کردار ادا کرے۔
اسپیشل گائیڈ بک کے مطابق انسدا دھوکہ دہی یونٹ کی ذمہ داری ہوگی کہ وہ مالیاتی فراڈ سے متعلق کارروائی،شواہد اور ممکنہ پالیسیاں تجویز کرے۔
انسدا دھوکہ دہی یونٹ بین الاقوامی تنظیموں سے جاری ہونے والے نئے ضوابط اور سفارشات سے استفادہ کرے اور مالیاتی فراڈ کے سدباب سے متعلق سرگرمیوں سے فائدہ اٹھائے۔
گائیڈ بک کے مطابق تمام بینکوں کو ہدایت کی گئی ہے کہ وہ اپنے کھاتے داروں کو مالیاتی فراڈ کے طور طریقوں کے بارے میں مسلسل آگاہ کرتے رہیں۔
واضح رہے کہ مالیاتی فراڈ سے بچاؤ کے لیے گائیڈ بک کا اجرا اس حوالے سے پیش آنے والے خطرات کو لگام لگانے میں معاون ثابت ہوگا۔
