The news is by your side.

Advertisement

وزیر اعظم کی ہدایت، ای ویزا پالیسی کے حوالے سے اہم قدم

اسلام آباد: وزیر اعظم کی ہدایت پر ای ویزا پالیسی کو مزید فعال بنانے کے لیے وزیر خارجہ شاہ محمود قریشی کی سربراہی میں اعلیٰ سطحی کمیٹی قائم کر لی گئی۔

تفصیلات کے مطابق پاکستان کی ای ویزا پالیسی کو مزید فعال بنانے کے لیے ایک کمیٹی کا قیام عمل میں لایا گیا ہے جس کا پہلا اجلاس گزشتہ روز وزیر خارجہ کی زیر صدارت منعقد ہوا، جس میں معید یوسف، رزاق داؤد، سیکریٹریز اور دیگر افسران نے شرکت کی، چیئرمین نادرا عثمان مبین نے ای ویزا سہولت اور مختلف کیٹیگریز کے حوالے سے بریفنگ دی۔

اعلیٰ سطحی کمیٹی کے قیام کا مقصد ملک میں سیاحت اور سرمایہ کاری کے فروغ کی غرض سے ای ویزا پالیسی کو مزید فعال بنانے کے لیے جامع سفارشات مرتب کرنا ہے، جنھیں بعد میں کابینہ کی منظوری کے لیے وزیر اعظم کو ارسال کیا جائے گا۔

وزیر خارجہ نے کہا کہ پاکستان میں سیاحت اور سرمایہ کاری کے شعبوں میں آگے بڑھنے کے بہت سے مواقع موجود ہیں۔

انھوں نے کہا ای ویزا پالیسی گزشتہ ڈیڑھ سال سے نافذ العمل ہے، پاکستان ميں سیاحت اور سرمایہ کاری کے فروغ کے حوالے سے ای ویزا پالیسی کے حوصلہ افزا نتائج کو دیکھتے ہوئے وزیر اعظم عمران خان نے اس پالیسی کو مزید وسعت دینے کا فیصلہ کیا ہے۔

ان کا کہنا تھا یہ اعلیٰ سطحی کمیٹی ان تمام پہلوؤں اور عوامل کا جائزہ لے گی جنھیں بروئے کار لا کر ہم ای ویزا پالیسی کو مزید فعال اور نتیجہ خیز بنا سکتے ہیں۔

Comments

یہ بھی پڑھیں