عمران خان اور بلاول بھٹو کا اٹل بہاری واجپائی کے انتقال پر اظہار افسوس vajpayee
The news is by your side.

Advertisement

عمران خان اور بلاول بھٹو کا اٹل بہاری واجپائی کے انتقال پر اظہار افسوس

اسلام آباد: تحریک انصاف کے چیئرمین عمران خان اور پیپلزپارٹی کے چیئرمین بلاول بھٹو نے سابق بھارتی وزیر اعظم اٹل بہاری واجپائی کے انتقال پر افسوس کا اظہار کیا ہے۔

عمران خان نے کہا کہ اٹل بہاری واجپائی برصغیر کی قد آور سیاسی شخصیت تھے، پاک بھارت تعلقات میں واجپائی کی کوششیں یاد رکھی جائیں گی، ان کے انتقال سے جنوبی ایشیا کی سیاست میں خلا پیدا ہوگیا ہے۔

عمران خان نے کہا کہ قیام امن کی خواہش سرحد کی دونوں جانب پائی جاتی ہے، قیام امن ہی سے واجپائی کی خدمات کا حقیقی اعتراف ممکن ہے، دکھ کی اس گھڑی میں بھارت کے غم میں شریک ہیں۔

دوسری جانب پیپلزپارٹی کے چیئرمین بلاول بھٹو زرداری نے بھی واجپائی کے انتقال پر اظہار افسوس کرتے ہوئے کہا کہ واجپائی نے پاکستان اور بھارت میں اعتماد سازی کی کوششیں کیں، امید ہے بھارتی حکومت واجپائی کی روایات کو برقرار رکھے گی۔

مزید پڑھیں: بھارت کے سابق وزیر اعظم اٹل بہاری واجپائی چل بسے

واضح رہے کہ بھارت کے سابق وزیر اعظم اٹل بہاری واجپائی 93 برس کی عمر میں چل بسے، وہ کافی عرصے سے بیمار تھے۔

بھارتی وزیر اعظم نریندر مودی نے آج صبح اسپتال میں ان کی عیادت کی تھی، اٹل بہاری واجپائی کو جون میں اسپتال میں داخل کرایا گیا تھا، ڈاکٹروں نے سانس کی نالی میں انفیکشن بتایا تھا جبکہ ان کو گردوں کا مرض بھی لاحق تھا۔

اٹل بہاری واجپائی دو مرتبہ بھارت کے وزیر اعظم رہے، پہلی مرتبہ 16 مئی 1996ء سے یکم جون 1996ء یعنی 15 دن کے وزیر اعظم رہے، وہ دوسری مرتبہ 19 مارچ 1998 سے 22 مئی 2004ء تک وزارت عظمیٰ کی ذمہ داریاں نبھا چکے ہیں۔

Comments

comments

یہ بھی پڑھیں