اسلام آباد: اڈیالہ جیل میں قید سابق وزیر اعظم و چیئرمین پاکستان تحریک انصاف (پی ٹی آئی) نے اپنے خلاف سائفر کیس خارج کرنے استدعا کر دی۔
آرٹیکل 248 کے تحت استثنیٰ کی وجہ سے اسلام آباد ہائی کورٹ میں کیس خارج کرنے کی استدعا کی گئی۔ درخواست گزار نے مؤقف اختیار کیا کہ آفیشل سیکرٹ ایکٹ سیکشن 5 کا اطلاق نہ ہونے پر کیس خارج کیا جائے۔
چیف جسٹس اسلام آباد ہائی کورٹ نے چیئرمین پی ٹی آئی کی درخواست پر دو صفحات پر مشتمل تحریری حکم جاری کر دیا جس کے مطابق عدالت کو بتایا گیا آفیشل سیکرٹ ایکٹ کی سیکشن 5 کا اطلاق نہیں ہوتا۔
حکم نامے میں کہا گیا کہ سابق وزیر اعظم کو آرٹیکل 248 کے تحت استثنیٰ حاصل ہے، انہوں نے سائفر کیس کا ٹرائل روکنے کی بھی استدعا کی۔
چیئرمین پی ٹی آئی کی درخواست پر وفاقی تحقیقاتی ایجنسی (ایف آئی اے) کو 16 اکتوبر کیلیے نوٹس جاری کیا گیا۔ عدالت نے کہا کہ مقدمہ اخراج اور ٹرائل روکنے کی درخواست پر سماعت 16 اکتوبر کو ہوگی۔
چند روز قبل چیئرمین پی ٹی آئی نے سائفر کیس میں فرد جرم عائد کرنے کا حکم چیلنج کیا تھا جس میں 9 اکتوبر کے ٹرائل کورٹ حکم کو کالعدم قرار دینے کی استدعا کی گئی۔
درخواست میں مؤقف اختیار کیا گیا تھا کہ ٹرائل کورٹ نے لکھا کیس کی نقول وصول کر لیں حالانکہ وصول نہیں کیں، جیل سماعت کے خلاف ہائی کورٹ فیصلے کا بھی ٹرائل کورٹ نے انتظار نہیں کیا۔
یاد رہے کہ خصوصی عدالت نے سائفر کیس میں سابق وزیر اعظم اور وائس چیئرمین پی ٹی آئی شاہ محمود قریشی پر فرد جرم عائد کرنے کیلیے 17 اکتوبر کی تاریخ مقرر کر رکھی ہے۔
