اسلام آباد: وزیر اعظم عمران خان نے کہا ہے کہ ملکی ترقی کے لیے نظام تعلیم کو بہتر کیا جانا ضروری ہے، نوجوانوں کو فنی تربیت دے رہے ہیں تاکہ ملک کے لیے سرمایہ ثابت ہوں، معاشی مشکلات کے باوجود غربت کے خاتمے کے لیے پروگرام شروع کیا۔
تفصیلات کے مطابق وزیر اعظم عمران خان نے کاروبار میں آسانیوں سے متعلق تقریب سے خطاب کرتے ہوئے کہا کاروبار میں آسانی کے لیے اقدامات پر ماہرین کی کاوشیں قابل تحسین ہیں، ماضی میں پاکستان نے صنعتوں کی وجہ سے ترقی کی، چاہتے ہیں لوگوں کوغربت سے نکالیں، ورلڈ بینک کے بھرپور تعاون پر شکر گزار ہیں۔
انھوں نے کہا ماضی میں پاکستان کی حکومت اور بیوروکریسی ایشیا میں سب سے بہتر تھی، ہماری حکومت کو معاشی چیلنجز کا سامنا تھا لیکن خوش قسمتی سے پاکستان کے پاس بہترین معاشی ٹیم ہے۔
صدر ورلڈ بینک کا خطاب
تقریب سے صدر ورلڈ بینک ڈیوڈ مالپس نے بھی خطاب کیا، انھوں نے کہا تجارتی اصلاحات ضروری ہیں جن کا مقصد معیشت کا استحکام ہے، محصولات کی وصولی آسان ہوگی، درمیانے اور چھوٹے درجے کے کاروبار کو فروغ ملے گا۔
تازہ ترین: وزیر اعظم سے صدر ورلڈ بینک کی ملاقات، پاکستانی معیشت کے استحکام پر تبادلہ خیال
انھوں نے کہا غربت دور کرنے کے لیے حکومتو ں کومل کر کام کرنا ہوگا، آبی وسائل سے بجلی بنانا ہوگی تاکہ معاشی مسائل حل ہوں، ورلڈ بینک کے تعاون سے تربیلا 4 اور 5 منصوبے پر کام جاری ہے، اصلاحات سے کاروباری طبقے اور حکومت میں دوری کم ہوگی، تجارتی اصلاحات کا مقصد معیشت کا استحکام ہے۔
اسلام آباد میں آج کاروبار میں آسانیوں سے متعلق ایک نمائش کا بھی اہتمام کیا گیا، جس میں وزیر اعظم عمران خان بھی شریک ہوئے۔
