پاکستان تحریک انصاف کے چیئرمین اور سابق وزیراعظم عمران خان ملک کو درپیش سنگین معاشی بحران سے نکالنے کے لیے سرگرم ہوگئے ہیں۔
اے آر وائی نیوز کو ذرائع کے ملنے والی اطلاعات کے مطابق ملک کو درپیش سنگین معاشی بحران سے نکالنے کے لیے پی ٹی آئی چیئرمین عمران خان نے اپنی معاشی ٹیم کو تجاویز تیار کرنے کی ہدایت دے دی ہے۔ جس کے بعد معاشی ٹیم اکنامک پیپر تیار کرکے گی۔
ذرائع کے مطابق اکنامک پیپر کی تیاری کے لیے ٹیم میں سابق وفاقی وزیر خزانہ شوکت ترین، تیمورجھگڑا، مزمل اسلم، حماد اظہر اور دیگر معاشی ماہرین کو شامل کیا جائے گا جب کہ پارٹی کے منشور میں بھی اکنامک پیپرز کی تجاویز کو شامل کیا جائے گا۔
ذرائع کا کہنا ہے کہ آئندہ انتخابی مہم میں معاشی بحران سے نکلنے کا حل قوم کو بتایا جائے گا جب کہ عمران خان عوامی اجتماعات میں اکنامک پیپرز کی تجاویز سے قوم کو آگاہ کریں گے۔
