The news is by your side.

Advertisement

حقیقی آزادی کے لیے میں سندھ کےعوام کے پاس جاؤں گا ، عمران خان

اسلام آباد : سابق وزیراعظم عمران خان نے سندھ کی صورتحال پر تشویش کا اظہار کرتے ہوئے کہا حقیقی آزادی کے لیے میں سندھ کےعوام کے پاس جاؤں گا۔

تفصیلات کے مطابق سابق وزیراعظم عمران خان سے سابق گورنر سندھ عمران اسماعیل کی بنی گالہ میں ملاقات ہوئی ، ملاقات میں عامر محمود کیانی، منارٹی ونگ کے مرکزی صدر جئے پرکاش لوہانا بھی موجود تھے۔

دوران ملاقات امپورٹڈ حکومت کے خلاف حقیقی آزادی مارچ کے حوالے سے گفتگو کی گئی اور عمران اسماعیل نےعمران خان کو سندھ کی سیاسی صورتحال اور سندھ میں پانی کی مصنوعی قلت سے آگاہ کیا۔

چیئرمین پی ٹی آئی عمران خان نے سندھ کی صورتحال پر تشویش کا اظہار کرتے ہوئے کہا سندھ کے لوگوں کو پیپلزپارٹی نے بنیادی سہولتوں سےمحروم رکھا ہے، سندھ کے لوگ آصف زرداری مافیا کے خلاف بیدار ہوچکے ہیں۔

عمران خان کا کہنا تھا کہ مجھے سندھ کے باسیوں میں حقیقی آزادی کا شعور نظر آرہا ہے، حقیقی آزادی کے لیے میں سندھ کےعوام کے پاس جاؤں گا، مارچ کے لیے سندھ کے لوگ بڑی تعداد میں ہمارے ساتھ نکلیں۔

انھوں نے کہا کہ سندھ میں پانی کی مصنوعی قلت پیدا کرکے زمینیں تباہ کی جارہی ہیں، سندھ میں چھوٹے کاشتکار تباہ ہوگئے ہیں ، آصف زرداری کی شوگر ملیں اور زمینیں بڑھ رہی ہیں۔

اس موقع پر عمران اسماعیل کا کہنا تھا کہ سندھ کے عوام عمران خان کی کال کے منتظر ہیں، سندھ کا نوجوان تبدیلی کے لیے کمر کس چکا ہے، امپورٹڈ حکومت کے خاتمے کی شروعات سندھ سے ہوگی۔

انھوں نے کہا کہ پی پی نے سندھ کے لوگوں کا پانی بند کیا ہوا ہے، پی پی چھوٹے کاشتکاروں کی زمینیں ہڑپنے کامنصوبہ بنا رہی ہے،سندھ ہر جدوجہد میں پی ٹی آئی کے ساتھ کھڑاہے۔

Comments

یہ بھی پڑھیں