اسلام آباد: وزیر اعظم عمران خان بحرین روانہ ہو گئے، زلفی بخاری بھی ان کے ہم راہ ہیں، بحرین کے فرماں روا احمد بن عیسیٰ الخلیفہ نے وزیر اعظم کو دورے کی دعوت دی ہے۔
تفصیلات کے مطابق وزیر اعظم بحرین روانہ ہو گئے، بحرین روانگی سے قبل وزیر اعظم سے امریکی سینیٹر لنزے گراہم نے ملاقات کی، جس میں وزیر خارجہ شاہ محمود قریشی بھی موجود رہے، ملاقات میں دونوں ممالک کے وفد بھی شامل تھے۔
امریکی سینیٹر لنزے گراہم آج ہی دس رکنی اعلیٰ سطح وفد کے ہم راہ پاکستان پہنچے ہیں، وفد کی سربراہی سینیٹر گراہم کر رہے ہیں، ذرایع کے مطابق یہ وفد قطر کے شہر دوحہ سے خصوصی طیارے پر اسلام آباد پہنچا ہے۔
دوسری طرف امریکی وفد سے ملاقات کے بعد وزیر اعظم عمران خان بحرین کے قومی دن کی تقریب میں مہمان خصوصی کے طور پر شرکت کے لیے بحرین روانہ ہو گئے، منصب سنبھالنے کے بعد وزیر اعظم کا یہ پہلا دورہ بحرین ہے، اس دوران وزیر اعظم اور بحرین کے فرماں روا کے درمیان ون آن ون ملاقات ہوگی۔
یہ بھی پڑھیں: وزیر اعظم کا دورہ بحرین دو طرفہ تعلقات کے نئے دور کا آغاز ہے: فردوس عاشق اعوان
دونوں رہنماؤں کے مابین ملاقات میں پاک بحرین دو طرفہ تعلقات پر تفصیل سے گفتگو ہوگی، جب کہ وزیر اعظم عمران خان کو بحرین کے سب سے بڑے سِول اعزاز سے نوازا جائے گا۔
ادھر معاون خصوصی فردوس عاشق اعوان نے کہا ہے کہ وزیر اعظم عمران خان کا دورۂ بحرین باہمی تعلقات کے نئے دور کا آغاز ہے، یہ دورہ دونوں ملکوں میں باہمی تعاون کے فروغ کی نئی راہیں کھولے گا۔
معاون خصوصی نے ٹویٹ میں لکھا کہ بحرین سے مشترکہ ثقافت، مذہب اور باہمی اعتماد پر مبنی رشتے قائم ہیں، دونوں ملک عوام کے مفاد میں تعلقات کو مزید مضبوط بنانے کے لیے پُر عزم ہیں۔
