اسلام آباد : چیئرمین پی ٹی آئی عمران خان کے سرکاری ہیلی کاپٹراستعمال کرنے پر نیب کے سربراہ نے نوٹس لیتے ہوئے ڈی جی نیب خیبرپختونخوا کوانکوائری کاحکم دے دیا، ترجمان پی ٹی آئی کا کہنا ہے کہ ہیلی کاپٹرایک منٹ کیلیے بھی ذاتی استعمال میں نہیں لیا گیا۔
تفصیلات کے مطابق قومی احتساب بیورو نے اعلامیہ جاری کیا ہے کہ چیئرمین عمران خان نے74گھنٹےسرکاری ہیلی کاپٹرغیرسرکاری دوروں کیلئےاستعمال کیا، نیب اعلامیہ میں مزید کہا گیا کہ وزیراعلیٰ خیبرپختونخوا نےاختیارات کا ناجائز استعمال کیا۔
اعلامیہ کے مطابق عمران خان نے ایم آئی17 ہیلی کاپٹر بائیس گھنٹے استعمال کیا جبکہ ایکیوریئل ہیلی کاپٹر باوون گھنٹےاستعمال کیا گیا، ڈی جی نیب خیبرپختونخوا معاملہ کی انکوائری کرائیں۔
چیئرمین نیب کی ہدایت پرعمران خان کوسرکاری ہیلی کاپٹر استعمال کرنے کے حوالے سے وزیر اعلیٰ کے پی کے پرویز خٹک کیخلاف انکوائری شروع کردی گئی ہے۔
نیب کے نوٹس پر پی ٹی آئی کا خیر مقدم، ہیلی کاپٹر کے ذاتی استعمال کی تردید
دوسری جانب بنی گالہ اسلام آباد میں پی ٹی آئی کور گروپ کا اجلاس منعقد کیا گیا، اجلاس میں ہیلی کاپٹرکے استعمال کا معاملہ بھی زیر بحث آیا، اجلاس میں اراکین نے عمران خان کے خلاف نیب کے نوٹس کا خیر مقدم کیا۔
ان کا کہنا تھا کہ عمران خان نے ایک منٹ کے لیے بھی ہیلی کاپٹر کا ذاتی استعمال نہیں کیا، اس کا سب سے زیادہ استعمال گورنر پختونخوا نے کیا، اراکین نے مطالبہ کیا کہ دیگر صوبوں کے ہیلی کاپٹرز اور جہازوں کے استعمال کی تحقیقات بھی کی جائیں۔
اس کے علاوہ اجلاس میں ٹرائل کورٹ میں نواز شریف کے خلاف مقدمات کی نگرانی کا فیصلہ کرتے ہوئے جنگ اور جیو گروپ کی بدعنوانیوں پر بھی غورکیا گیا۔
اس موقع پر عمران خان نے جنگ جیو گروپ کے خلاف نیب میں جانے کا فیصلہ بھی کیا۔ علاوہ ازیں اجلاس میں رکن قومی اسمبلی علی محمد خان کو خیبرپختونخوا حکومت کا ترجمان مقررکرنے کا فییصلہ کیا گیاہے۔
