پاکستان تحریک انصاف کے چیئرمین اور سابق وزیر اعظم عمران خان کا کہنا ہے کہ انقلاب ہماری دہلیز پر دستک دے رہا ہے، پُرامن انتخاب کے ذریعے راستہ فراہم کیا جائے۔
عمران خان سے پنجاب کی صوبائی کابینہ نے ملاقات جس میں پنجاب کے انتظامی و سیاسی اُمور پر تفصیلی تبادلہ خیال کیا گیا۔ عمران خان نے کابینہ ارکان کو پنجاب ضمنی انتخاب میں شاندار کامیابی پر مبارکباد دی۔
چیئرمین پی ٹی آئی نے کہا: ’پنجاب ضمنی انتخابات میں کامیابی تحریک انصاف پر عوامی اعتماد کا اظہار ہے، چوہدری پرویز الٰہی ایک عملی سیاستدان ہیں، ہم نے بھرپور ساتھ دینا ہے۔ پنجاب میں تحریک انصاف سےعوام حقیقی آزادی کی تکمیل توقع کر رہے ہیں‘۔
سابق وزیراعظم نے کہا کہ پنجاب کابینہ اور پارلیمانی پارٹی حقیقی آزادی کے مؤقف پر عوام کے ساتھ کھڑی رہے، عوام ہمارے ساتھ ہے ہمیں جلد انتخابات کی جانب بڑھنا ہے، فوری انتخابات تحریک انصاف کی ضرورت نہیں بلکہ ملک کی ضرورت ہیں۔