ٹرمپ نے اپنی تقریر کے ذریعے پاکستانیوں کی توہین کی ، عمران خان -
The news is by your side.

Advertisement

ٹرمپ نے اپنی تقریر کے ذریعے پاکستانیوں کی توہین کی ، عمران خان

اسلام آباد : پاکستان تحریک انصاف کے سربراہ کا کہنا ہے کہ ٹرمپ نے اپنی تقریر کےذریعے پاکستانیوں کی توہین کی، پاکستان نے نائن الیون کے بعد سے امریکا کا ساتھ دیا ، ڈونلڈ ٹرمپ کی افغان پالیسی فلاپ پالیسی ہے۔

تفصیلات کے مطابق امریکی ٹی وی کو انٹرویو میں پی ٹی آئی چیئرمین عمران خان نے کہا ٹرمپ نے اپنی تقریر کےذریعے پاکستانیوں کی توہین کی، ٹرمپ کےخیالات نے ہر پاکستانی کے جذبات بری طرح مجروح کئے، پاکستان کوامریکی جنگ میں معاونت کابھاری جانی ومالی نقصان پہنچا اور 70ہزار پاکستانیوں نے اس جنگ میں اپنی جانیں گنوائیں۔

ٹرمپ کےخیالات نے ہر پاکستانی کے جذبات بری طرح مجروح کئے

عمران خان کا کہنا تھا کہ امریکہ کا اپنی ناکامیوں کا ذمہ دار پاکستان کو ٹھہرانا تکلیف دہ ہے، امریکہ کی ناکام پالیسیوں کا تسلسل ہےجس کا بوجھ اس پرہے، امریکہ قتل عام کے بجائے متبادل رستوں کا انتخاب کرے اور افغانستان سے رخصتی کے آپشن پرسنجیدگی سے غورکرے، امریکہ دہشتگردوں کی پناہ گاہوں سےواقف ہے تو پاکستان کو مطلع کیوں نہیں کرتا۔

تحریک انصاف کے سربراہ نے کہا کہ افغان جنگ کا کوئی بنیادی مقصد نہیں تھا، افغانستان میں موجود ڈیڑھ لاکھ فوجی کچھ نہ کرسکے، افغان ایڈونچرمیں پاکستانی معیشت کو 100ارب ڈالرز سے زائد کا شدیدترین دھچکہ پہنچا، قبائلی علاقوں میں بسنے والے لاکھوں افرادجنگ کے دوران بے گھرہوئے۔

دنیا کی طاقتور ترین فوج چند سو دہشت گردوں سے ہار رہی ہے؟

انٹرویو میں عمران خان نے سوال کیا کہ کیا دنیا کی طاقتور ترین فوج چند سو دہشت گردوں سے ہار رہی ہے؟ امریکی انتظامیہ کی جانب سے سنائے گئے لطیفے پر کون یقین کریگا؟ کیا جنگ کے اختتام پر امریکہ اپنی ناکامیوں کا ملبہ پاکستان پر گرائے گا، میری نگاہ میں پاکستان نے افغانستان میں امریکی جنگ کا بے انتہاخمیازہ بھگتا ہے۔

انھوں نے کہا کہ جنگ ناقص ترین حکمت عملی ،مبہم مقاصد ک ساتھ شروع کی گئی، کبھی بھی اس تنازعے کا سیاسی حل تلاش کرنے کی کوشش نہیں کی گئی، دنیا کے کس ملک کے70 ہزارافراد نے امریکی معاونت میں جانیں دیں؟

حکومت پاکستان امریکی امداد کی پرواہ نہ کرے

پی ٹی آئی چیئرمین کا کہنا تھا کہ حکومت پاکستان کو تجویز دوں گا امریکی امداد کی پرواہ نہ کرے، امریکی امداد ہمیں انتہائی مہنگی پڑی ہے، پوری قوم مسلح گروہوں کو غیرمسلح کرنے پر مکمل طور پر متفق ہے، 80 کی دہائی کے ورثے کو ختم ہونا چاہیے۔

ڈونلڈ ٹرمپ کی پالیسی فلاپ پالیسی ہے

عمران خان نے انٹرویو میں مزید کہا کہ افغانستان میں امریکی پالیسی ناکام ہوئی، ڈونلڈ ٹرمپ کی پالیسی فلاپ پالیسی ہے، دنیا کی بہترین فوج چند ہزارجنجگوؤں کے سامنے ناکام ہوگئی، یہ بات باقابل یقین ہے۔

پاکستان تحریک انصاف کے سربراہ کا کہنا تھا کہ افغانستان میں مزید فوجی بھیجنے سے امریکا کو فائدہ نہیں ہوگا ،جب تک افغانستان میں افواج موجود رہے گی مسئلہ حل نہیں ہوگا، امریکا نے افغان مسئلہ کا سیاسی حل نکالنے کی کوشش نہیں کی، افغانستان کے حل کیلئے امریکہ چین، ایران اور روس کوشریک کرے۔


اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس  وال پر شیئر کریں۔

Comments

comments

یہ بھی پڑھیں