The news is by your side.

Advertisement

اقتدار میں آکر کم زور لوگوں کو طاقتوروں کے برابر کھڑا کردیں گے: عمران خان

میں کرپشن اور منی لانڈرنگ کروں تو مجھ سے بھی وفاداری نہ کی جائے

منڈی بہاؤالدین: تحریک انصاف کے چیئرمین عمران خان نے کہا ہے کہ اب تک ساری پالیسیاں طاقت ور لوگوں کے لیے ہوتی تھیں، ہم اقتدار میں آکر سب کے لیے ایک ہی پالیسی رکھیں گے۔

یہ بات انھوں نے ملکوال میں پی ٹی آئی جلسے سے خطاب کرتے ہوئے کہی۔ انھوں نے کہا کہ ہم کم زور لوگوں کو طاقت وروں کے برابر کھڑا کریں گے.

وعدے توسب کرتے ہیں لیکن پورا کون کرے گا، میں وعدے پورے کرکے دکھاؤں گا

عمران خان

عمران خان کا کہنا تھا کہ غریب اورامیرکا بچہ ایک جگہ سے تعلیم حاصل کرے گا، ہمارا پاکستان وہ ہے جہاں غریب کے بچے بھی اوپر آئیں۔

عمران خان نے سابق پی پی رہنما ندیم افضل چن کی تحریک انصاف میں شمولیت پر کہا کہ ’چن صاحب، میں پندرہ سال قبل اس علاقے میں آیا تھا، آپ نے پارٹی میں آنے میں اتنی دیر کیوں کی۔‘

انھوں نے جلسے سے خطاب میں کہا کہ ندیم افضل چن کا فیصلہ علاقے کے لوگوں کے لیے درست ثابت ہوگا۔

ان کا کہنا تھا کہ میں کرپشن اور منی لانڈرنگ کروں تو مجھ سے بھی وفاداری نہ کی جائے۔ جب تک راہ حق پر ہوں مجھ سے وفادار رہیں۔

عمران خان نے کہا پاکستان میں ڈھائی کروڑ بچے اسکول ہی نہیں جاتے اور امیروں کے بچے کروڑوں کے محلات خرید لیتے ہیں، یہ ہوہی نہیں سکتا کہ ملک ترقی کرے اور آدھی آبادی غریب ہو۔

انتیس اپریل کو مینار پاکستان پر سالگرہ کا جشن منائیں گے، عمران خان

انھوں نے کہا کہ کسانوں کو ان کی محنت کا پھل نہیں ملتا، خوشی ہے کہ جہانگیر ترین کسانوں کو پورے نرخ دیتا ہے، ان کا کہنا تھا کہ وعدے توسب کرتے ہیں لیکن پورا کون کرے گا، میں وعدے پورے کرکے دکھاؤں گا۔

خیال رہے کہ پی ٹی آئی چیئرمین عمران خان پارٹی کے بائیسویں یوم تاسیس کے موقع پر انتیس اپریل کو مینار پاکستان پر جلسے کے سلسلے میں پنجاب بھرمیں دورے کر رہے ہیں۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں