لاہور : چیئرمین پی ٹی آئی عمران خان نے مسلح افواج کے نئے سربراہ کی تعیناتی پر مشاورت کے لئے قانونی ماہرین کو طلب کرلیا۔
تفصیلات کےمطابق چیئرمین پی ٹی آئی عمران خان نےشام7بجےقانونی ماہرین کااجلاس طلب کرلیا، عمران خان وڈیولنک کے ذریعے اپنے قانونی مشیروں سے نئے آرمی چیف کی تعیناتی پر مشاورت کریں گے
اجلاس میں شرکت کے لیے قانونی مشیروں کو پیغامات بھجوا دیے گئے ہیں۔
دوسری جانب نئے آرمی چیف کی نامزدگی پر پاکستان تحریک انصاف کی جانب سے کہا گیا ہے کہ آرمی چیف تعیناتی میں پی ٹی آئی کیجانب سے کوئی رکاوٹ نہیں ڈالی جائے گی۔
سینیٹر شبلی فراز نے اس حوالے سے پارٹی موقف پیش کرتے ہوئے کہا کہ تعیناتی کا عمل آئین اور قانون کے مطابق ہوگا۔ آرمی چیف تعیناتی پر صدر قانون اور آئین کے مطابق چلیں گے اور اس معاملے پر پی ٹی آئی کی جانب سے کوئی رکاوٹ نہیں ڈالی جائے گی۔
پی ٹی آئی سینیٹر کا کہنا تھا کہ عمران خان سے مشورہ صدر مملکت کا اخلاقی حق ہے جو انہیں استعمال کرنا چاہیے اور اس حوالے سے مشورہ کرنا چاہیے۔