The news is by your side.

Advertisement

وزیراعظم عمران خان اور ازبک صدر سے گفتگو، اہم امور پر تبادلہ خیال

اسلام آباد : وزیراعظم عمران خان اور ازبکستان کے صدر کے درمیان آن لائن گفتگو ہوئی ہے، جس میں پاکستان، افغانستان سمیت باہمی دلچسپی، علاقائی اور عالمی امور پر تبادلہ خیال کیا گیا۔

وزیراعظم ہاؤس سے جاری اعلامیہ کے مطابق دونوں رہنماؤں نے اپنی گفتگو میں پاک ازبکستان تعلقات، مذہبی، تاریخی اور ثقافتی تعلقات پر روشنی ڈالی اور اعلیٰ سطح روابط کی رفتار برقرار رکھنے کے عزم کا اعادہ کیا۔

اعلامیہ کے مطابق بات چیت میں سیاسی، تجارتی، سلامتی، دفاع، تعلیم اور ثقافت میں تعاون جاری رکھنے پر اتفاق کے علاوہ مذہبی اور سیاحت سمیت رابطوں کی مزید حوصلہ افزائی پر بھی اتفاق کیا گیا۔

وزیراعظم عمران خان نے ٹرانزٹ ٹریڈ ایگریمنٹ کی جلد تکمیل یقینی بنانے پر زور دیا اور سیکیورٹی و دفاعی تعاون میں اضافے پر بات کی، وزیراعظم نے تعلیم، ثقافت،سیاحت کے شعبوں میں باہمی تعاون کے فروغ پر بھی بات کی۔

اس کے علاوہ وزیر اعظم عمران خان نے ریل، سڑک، فضائی رابطوں کی اہمیت پر روشنی ڈالتے ہوئے کہا کہ وسطی ایشیا جیو اکنامک نقطہ نظر میں خاص توجہ کا حامل علاقہ ہے۔

اعلامیہ کے مطابق وزیراعظم عمران خان نے ازبک صدر کو مقبوضہ کشمیر کی صورتحال سے بھی آگاہ کرتے ہوئے جنوبی ایشیا میں امن و سلامتی کے امور پر پاکستان کا نقطہ نظر بیان کیا۔

 

Comments

یہ بھی پڑھیں