کراچی : وزیر اعلیٰ سندھ کرونا وائرس کی صورتحال سے متعلق کہا ہے کہ گزشتہ 24 گھنٹوں کے دوران کوویڈ 19 سے متاثرہ مزید 31 مریض دنیائے فانی سے رخصت ہوگئے۔
تفصیلات کے مطابق کرونا وائرس کی جان لیوا وبا نے دیگر ممالک کی طرح پاکستان میں بھی سیکڑوں انسانوں کی جانیں لے لیں ہیں، وزیر اعلیٰ سندھ سید مراد علی شاہ نے کورونا وائرس کی صورتحال سے متعلق بیان میں کہا ہے کہ کرونا وائرس سے متاثرہ 40 ہزار 967 مریض سندھ میں زیر علاج ہیں۔
انہوں نے بتایا کہ گزشتہ 24 گھنٹےمیں مزید 31 مریض انتقال کرگئے، جس کے بعد انتقال کرنے والوں کی تعداد 1826 ہوگئی ہے۔
مراد علی شاہ نے کہا کہ 24 گھنٹے میں 8929 ٹیسٹ کیے گئے جس کے بعد اب تک کیے جانے والے ٹیسٹ کی تعداد 5 لاکھ 84 ہزار 596 ہوگئی ہے۔
پچھلے چوبیس گھنٹوں کے دوران 1089 نئے کیس سامنے آئے جس کے بعد مجموعی تعداد ایک لاکھ6ہزار662 ہوچکی ہے۔
وزیر اعلیٰ سندھ کا کہنا تھا کہ تاحال 40967 مریض زیر علاج ہیں، جس میں سے زیر علاج مریضوں میں 39375 گھروں اور 398 آئسولیشن مراکز میں ہیں جبکہ 1194مریض مختلف اسپتالوں میں زیر علاج ہیں۔
انہوں نے کہا کہ طبی ماہرین کی جانب سے زیر علاج 722مریضوں کی حالت تشویشناک بتائی جارہی ہے اور 121مریض وینٹی لیٹرز پر ہیں۔
وزیر اعلیٰ سندھ سید مراد علی شاہ کا کہنا تھا کہ آج کرونا کے 1871 مریض صحتیاب ہوئے جس کے بعد صحتیاب ہونے والوں کی 63 ہزار 829 تک پہنچ گئی ہے، سندھ میں صحتیابی کی شرح 60 فیصد ہے۔
