سربیا میں منعقدہ ورلڈ ریسلنگ چیمپئن شپ 2023 کے پہلے ہی راؤنڈ میں پاکستانی ریسلر انعام بٹ شکست سے دوچار ہوگئے، انعام 86 کلوگرام کی کیٹیگری میں نبرد آزما تھے۔
چیمپئن شپ میں انعام بٹ کا اسپین کے پہلوان فریوو ناسکیدوا سے پہلے راونڈ میں مقابلہ تھا۔ پہلے راؤنڈ میں اپنے مخالف کے خلاف انعام بٹ کو برتری حاصل ہوگئی تھی تاہم دوسرے راونڈ میں فریوو نے 2 مرتبہ انعام کو داؤ لگا کر قابو کیا اور اہم پوائنٹس اپنے کھاتے میں لکھوائے۔
بلغراد میں 86 کلوگرام کی کیٹیگری میں زور آزمائی کرنے والے پاکستان کے محمد انعام بٹ کو پہلے راؤنڈ میں ہی 11 ۔ 1 سے ہار کا منہ دیکھنا پڑا۔
اب پاکستان کی طرف سے ورلڈ ریسلنگ چیمپئن شپ میں عنایت اللہ اور محمد بلال اتوار کو ایکشن میں ہوں گے۔
ورلڈ چیمپئن شپ کی ہر ویٹ کیٹیگری میں ابتدائی 5 پوزیشن حاصل کرنے والے ریسلرز پیرس میں منعقد ہونے والے اولمپکس کے لیے کوالیفائی کریں گے۔
