اسلام آباد: بھارتی سوشل میڈیا پر پاکستان کے خلاف زہر آلود پروپیگنڈے میں اضافہ دیکھنے میں آیا ، مرکزی ہدف چیئرمین سی پیک اتھارٹی عاصم سلیم باجوہ رہے۔
تفصیلات کے مطابق انسٹی ٹیوٹ آف پالیسی ریسرچ کی جانب سے رپورٹ جاری کی گئی ہے ، جس میں بتایا گیا ہے کہ بھارتی سوشل میڈیا پر پاکستان کے خلاف زہر آلود پروپیگنڈے میں اضافہ دیکھنے میں آیا ، ڈیجیٹل میڈیا پر پاکستان کیخلاف بھارتی پروپیگنڈا کی نشاندہی کر دی گئی ہے۔
رپورٹ میں کہا گیا ہے کہ بھارت کی جانب سے 2018 کے انتخابات کے بعد پاکستان مخالف پروپیگنڈے میں تیزی آئی اور اگست 2020ء سے اب تک بھارتی پروپیگنڈے کے 4 بڑے اہداف رہے۔
جن میں مرکزی اور اہم ہدف چیئرمین سی پیک لیفٹیننٹ جنرل (ر)عاصم سلیم باجوہ رہے جبکہ بھارتی پروپیگنڈے میں پاک فوج کے خلاف مہم دوسرابڑاٹارگٹ رہا اور پاکستان میں انتشار اور بدامنی پھیلانا تیسرا بڑاہدف نظر آیا۔
رپورٹ میں بتایا گیا کہ اس کے علاوہ مقبوضہ کشمیر پر پروپیگنڈے اور سی پیک کو سبوتاژ کرنے کیلئے ڈیجیٹل میڈیا کا استعمال بھی جاری ہے۔
خیال رہے بھارتی میڈیا نے پاکستان کےخلاف ایک بار پھرمضحکہ خیز پروپیگنڈا شروع کیا اورکراچی میں گیس لیکیج کے دھماکے کو خانہ جنگی کا نتیجہ قرار دیا جبکہ ٹوئٹر کے مصدقہ بھارتی اکاؤنٹس سے جعلی ٹویٹ کیے گئے۔
