لندن: کوروناوائرس کا شکار ہونے والے برطانوی پائلٹ نے طویل مدت تک اسپتال میں زیرعلاج رہ کر نیا ریکارڈ بنا دیا، انہوں نے 243 دن اسپتال میں گزارے اور وبا کو شکست دی۔
غیرملکی خبررساں ادارے کی رپورٹ کے مطابق نیکولاس نامی 59 سالہ پائلٹ مہلک وائرس کا شکار ہونے کے بعد امریکا میں 243 دن تک زیر علاج رہے اور اس طرح وہ طویل دورانے تک زیرعلاج رہ کر وبا کو شکست دینے والے ممکنہ طور پر پہلے مریض بن گئے، کورونا کے مریض عموماً ایک ہفتے یا زیادہ سے زیادہ 15 دن تک زیرعلاج رہتے ہیں۔
رپورٹ کے مطابق نیکولاس کورونا علامات ظاہر ہونے پر امریکی ریاست ٹیکساس کے شہر ہیوسٹن میں ایک اسپتال میں گزشتہ سال مارچ سے زیر علاج رہے اور دسمبر کے اختتام پر ڈسچارج ہوئے۔
کورونا کا شکار ہونے کے بعد پائلٹ میں شدید علامات سامنے آئیں انہیں دل اور پھیپھڑوں کے مسائل کے باعث وینٹی لیٹر پر رکھا گیا، خوش قسمتی سے وہ روبہ صحت ہوگئے۔ اسپتال سے ڈسچارج ہونے پر انہوں نے انتہائی خوشی کا اظہار کیا۔
نکولا نامی بیوی اپنے شوہر کی دیکھ بھال کے لیے روزانہ اسپتال کا چکر لگاتی تھی۔ نیکولاس تقریباً 8 ماہ تک زیرعلاج رہے۔ اسپتال سے گھر واپسی پر ان کا کہنا تھا کہ میں نے خطرناک مراحل کو عبور کیا جس پر بے حدخوشی ہے، اپنی بیوی کی محبت کی وجہ سے آج میں دوبارہ اپنے بچوں کے پاس جارہا ہوں۔
