نئی دہلی : شمالی بھارت میں گزشتہ روز ایک مسافر بس پہاڑی سڑک سے پھِسل کر گہری کھائی میں جا گری، حادثے میں اسکول کے بچوں سمیت 16 افراد جان کی بازی ہار گئے۔
اس حوالے سے بھارتی ریاست ہماچل پردیش کے ضلع کولو کے ایک اعلیٰ عہدئٓیدار نے میڈیا کو بتایا کہ ریسکیو اہلکاروں نے شدید زخمیوں کو بس کے ملبے سے نکالا اور انہیں ہسپتال منتقل کیا۔
امریکی خبر رساں ایجنسی اے پی کے مطابق ایک اور اہلکار پرشانت سرکیک سنگھ نے بتایا کہ مذکورہ بس میں تقریباً 20مسافر سوار تھے۔
سوشل میڈیا پر شیئر کی گئی تصاویر میں دیکھا جاسکتا ہے کہ ریسکیو اہلکار حادثے میں تباہ ہونے والی پیلے رنگ کی بس سے زخمی افراد کو نکالنے کی کوشش کر رہے ہیں۔
حکام کے مطابق بس کو پیش آنے والے حادثے کی وجہ فوری طور پر معلوم نہیں ہو سکی۔ واضح رہے کہ انڈیا میں خراب ڈرائیونگ، ٹُوٹی سڑکوں اور پرانی گاڑیوں کی وجہ سے سڑکوں پر ہونے والے جان لیوا حادثات عام ہیں۔
پولیس کے مطابق انڈیا میں ہر سال ٹریفک حادثات میں ایک لاکھ 10 ہزار سے زیادہ افراد ہلاک ہوجاتے ہیں۔
