نئی دہلی : بھارتی دارالحکومت نئی دہلی کے مشہور بازار چاندنی چوک کی مارکیٹ میں اچانک آگ بھڑک اٹھی جس نے دیکھنے ہی دیکھتے تین عمارتوں کو لیپٹ میں لے لیا۔
بھارتی میڈیا کے مطابق میگا الیکٹرونکس مارکیٹ میں لگنے والی آگ قابو سے باہر ہوگئی، آگ گزشتہ رات تقریباً 9 بجے بھڑکی اور صبح تک اس پر قابو پا لیا گیا تھا لیکن شعلے دوبارہ بھڑک اٹھے۔
متعلقہ حکام کا کہنا ہے کہ اب تک تقریباً 150 دکانیں جل کر خاکستر ہوچکی ہیں، جبکہ ایک محتاط اندازے کے مطابق اب تک 4 سو کروڑ بھارتی روپے کا نقصان ہو چکا ہے۔
آگ سے متاثر ہونے والی پانچ بڑی عمارتوں میں سے تین گرگئی ہیں، حکام نے بتایا کہ اگرچہ کوئی جانی نقصان یا کسی کے زخمی ہونے کی اطلاع نہیں ہے کیونکہ آتشزدگی کا یہ واقعہ دکانیں بند ہونے کے پیش آیا۔
خبر رساں ایجنی کے مطابق آگ کو لگے ہوئے تقریباً 24 گھنٹے سے زائد کا وقت ہوچکا ہے اور فائر فائٹرز ابھی تک آگ بجھانے کی جدوجہد کر رہے ہیں۔