لاہور: کھیل میں بھی بھارتی ہٹ دھرمی برقرار،پاکستان بلائنڈ کرکٹ ٹیم کو ویزے جاری کرنے سے انکار کردیا۔
تفصیلات کے مطابق بھارت نے پاکستانی بلائنڈ کرکٹ ٹیم کو ویزہ دینے سے انکار کردیا جس کے باعث پاکستان کی بلائنڈ کرکٹ ورلڈکپ میں شرکت سے محروم ہوگیا ہے۔
اسلام آباد میں بھارتی ہائی کمیشن نے پاکستان بلائنڈ کرکٹ کونسل کو باضابطہ آگاہ کردیااور بلائنڈ کرکٹ کونسل کوٹیم کے پاسپورٹ وصول کرنے کا کہہ دیا۔
بھارتی ہائی کمیشن نے موقف اپنایا کہ پاکستان کے ساتھ کھیلوں کی سرگرمیاں نہیں ہورہیں، کھیلوں کی سرگرمیوں نہ ہونے کی وجہ سے ویزہ جاری نہیں کرسکتے۔
پاکستان بلائنڈ کرکٹ کونسل کا اظہار مایوسی
ادھر پاکستان بلائنڈ کرکٹ کونسل نے بھارت کی جانب سے ویزے جاری نہ کرنے کے فیصلے پر مایوسی کا اظہار کیا ہے، اپنے بیان میں پاکستان بلائنڈ کرکٹ کونسل نے کہا کہ پاکستان کرکٹ ٹیم ورلڈ کپ جیتنے کی مضبوط امیدوار تھی، ہم بھارتی اقدام کی شدید مذمت کرتے ہیں۔
یہ بھی پڑھیں: پی سی بی کا اہم بولر کو غیرملکی لیگ کا این او سی دینے سے انکار
چیئرمین پاکستان بلائنڈ کرکٹ کونسل نے ورلڈ بلائنڈ کرکٹ کونسل سے مطالبہ کیا کہ کھیل میں سیاست کرنے پر بھارت کے خلاف ایکشن لیا جائے۔
واضح رہے کہ بلائنڈ کرکٹ ورلڈ کپ بھارت میں شروع ہو چکا ہے،بلائنڈ ورلڈ کپ میں بھارت، پاکستان، آسٹریلیا، بنگلادیش، سری لنکا، جنوبی افریقا، نیپال کی ٹیموں نے شرکت کرنی ہے۔
ورلڈ کپ میں پاکستان کو اپنا پہلا میچ 7 دسمبر کو جنوبی افریقا کیخلاف کھیلنا تھا جبکہ روایتی حریف بھارت کےخلاف 8دسمبر کو بڑا ٹاکرا ہونا تھا۔
