نئی دہلی : بھارتی شہری نے شراب نوشی کی خاطر ممتا کو بھلا دیا، بیٹے کے ہاتھوں ماں پر بدترین تشدد کی ویڈیو دیکھنے والوں کی آنکھیں نم ہوگئیں۔
بھارتی میڈیا کے مطابق ماں سے بدسلوکی کا واقعہ بھارتی ریاست مدھیہ پردیش میں پیش آیا جسے گھر کے کسی فرد نے موبائل کیمرے سے ریکارڈ کرکے انٹرنیٹ پر شیئر کیا۔
پولیس کے مطابق ریاست مدھیہ پردیش کے علاقے اشوک نگر میں شرد نامی ناخلف شخص آئے روز اپنی ماں کے ساتھ مار پیٹ کرتا اور اسے قتل کی دھمکیاں بھی دیتا تھا۔
ایک روز جب ناعاقبت اندیش اپنی ماں کو بدترین تشدد کا نشانہ بنانے کے بعد دھمکیاں دے رہا تھا کہ ‘اگر سدھری نہیں تو کاٹ ڈالوں گا’ تو گھر کے کسی فرد نے موبائل فون کیمرے میں سارا واقعہ ریکارڈ کرکے سوشل میڈیا پر شیئر کردیا۔
ویڈیو وائرل ہوئی تو دیکھنے والوں کی آنکھیں نم ہوگئیں، پولیس نے ویڈیو وائرل ہونے اور ماں کی شکایت پر ایکشن لیتے ہوئے بدبخت بیٹے کو گرفتار کرکے مقدمہ درج کرلیا۔
میڈیا رپورٹس میں بتایا گیا ہے کہ پولیس نے کارروائی کی تو بیٹے کی گرفتار کے وقت بھی متاثرہ خاتون بہت زیادہ سہمی ہوئی تھی۔
