مراد آباد : بھارت میں میاں بیوی کے جھگڑے کے دوران ایسا درد ناک واقعہ پیش آیا ہے جس کو دیکھ کر لوگوں کی دلی کیفیت عجیب سی ہوگئی۔
بھارتی ریاست اترپردیش کے ضلع مراد آباد میں میاں بیوی میں جھگڑے کے بعد علیحدگی ہوگئی تھی، گزشتہ روز بیوی نصرت اپنے بیٹے سے ملنے سسرال پہنچی اور گھر کے باہر کھڑے ہوکر بیٹے کو آواز دی۔
نصرت کی بہن نے تھانے میں میڈیا کو بتایا کہ بالکونی سے اس کی ساس نے اسے برا بھلا کہا جس پر ان کی تکرار ہوگئی اس کے بعد نصرت کے دیوروں اور نندوں نے اسے مل کر مارا اور سیڑھیوں سے گرا دیا۔
بہن کے مطابق یہ جان بچا کر وہاں سے بھاگی جس کے بعد محلے والوں نے ہمیں واقعے کی اطلاع دی، نصرت کے بھائی نے بتایا کہ جب ہم وہاں پہنچے تو وہاں بہن کی سسرال والوں نے ہم سے بھی مار پیٹ کی۔
نصرت کے بھائی نے بتایا کہ بات چیت دوران بہن کے دیور اور شوہر نے مجھ پر حملہ کردیا، بہنوئی نے میرے ہاتھ کی انگلی کو دانتوں سے کاٹ کر بری طرح زخمی کردیا۔
اس حوالے سے دونوں فریقین کی جانب سے تحریری شکایت تھانہ کٹگھر پولیس میں جمع کرادی گئی ہے پولیس کا کہنا ہے کہ طبی معائنے کی رپورٹ کی بنیاد پر ہی مزید کاروائی کی جائے گی۔
