میرٹھ : خاتون نے بدتمیزی کرنے والے دکاندار کو چھٹی کا دودھ یاد دلا دیا، موبائل شاپ کے مالک کی ڈنڈوں سے پٹائی کردی، ملزم پولیس کے پہنچنے سے پہلے فرار ہوگیا۔
بھارتی ریاست اترپردیش کے ضلع میرٹھ میں ایک خاتون کے ہاتھوں دکاندار کے پٹنے کا واقعہ پیش آیا ہے، خاتون کی سہیلی نے غصہ میں آکر ملزم پر ڈنڈوں کی بارش کردی۔
بھارتی میڈیا کے مطابق میرٹھ کے لال کرتی تھانے کے علاقے میں واقع ایک مارکیٹ میں موبائل کے پرزہ جات کی دکان چلانے والے شخص پر الزام ہے کہ اس نے موبائل میں ٹیمپرڈ گلاس لگوانے کیلئے آنے والی خاتون سے اس کا نمبر لے کر فون پر اس سے نازیبا گفتگو کی۔
خاتون نے اس بات کی اطلاع اپنی سہیلی کو دی جو ایک سیاسی اور سماجی کارکن بھی ہے، سہیلی کے ساتھ ہونے والے واقعے کے بعد خاتون نے دکان پر جاکر ہنگامہ کھڑا کردیا اور ڈنڈے سے دکاندار کی پٹائی کر ڈالی۔
سوشل میڈیا پر اس واقعے کی ویڈیو میں دکھایا گیا ہے کہ دکاندار پہلے تو مانا نہیں لیکن جب اسے بتایا گیا کہ اس کی کال کی ریکارڈنگ موجود ہے تو اس نے غلطی ماننے میں عافیت جانی اور معافیاں مانگنے لگا۔
ویڈیو وائرل ہونے کے بعد پولیس نے بھی معاملہ درج کرنے کے بعد کارروائی کرنے کی یقین دہانی کروائی، پولیس میں رپورٹ درج کرانے کے بعد سے ملزم جائے وقوعہ فرار ہے۔
اس حوالے سے میرٹھ پولیس کا کہنا ہے کہ خاتون نے دکاندار کے خلاف چھیڑ چھاڑ کرنے کی شکایت درج کروائی ہے اور اب اس معاملے پر مزید کارروائی کی جائے گی۔
