The news is by your side.

Advertisement

بھارت : ماں نے بیٹے کو بچاتے ہوئے خود بھی جان دے دی

نئی دہلی : بیٹے کو بچاتے ہوئے ماں بھی جان سے چلی گئی، دو نعشیں اٹھنے پر علاقے میں کہرام مچ گیا، تہوار کی رنگینیوں کا منظر سوگ میں بدل گیا۔

بھارت کے علاقے بیجا پور کے ضلع نیڈا گونڈی میں خوشی کا تہوار منانے والے اس وقت افسردہ ہوگئے جب ان کے گاؤں میں ماں بیٹے کی دونعشیں لائی گئیں۔

بیٹے کو ندی میں ڈوبتا دیکھ کر اُسے بچانے کی کوشش میں ماں بھی ندی میں ڈوب گئی یہ واقعہ گزشتہ روز دوپہر کو پیش آیا جب علاقہ کے عوام وجے دشمی کا تہوار منانے میں مصروف تھے۔

بھارتی میڈیا سے ملنے والی اطلاعات کے مطابق مرنے والی خاتون کی شناخت نیڈگونڈی کی رہنے والی28سالہ انجنا کوچی کورو اور اس کا آٹھ سالہ بیٹے ناگیش کے نام سے کی گئی ہے۔

اس حوالے سے ذرائع کا کہنا ہے کہ انجنا نامی خاتون اپنے 8سالہ بیٹے کے ساتھ نیڈا گونڈی کے پرانے بس اسٹینڈ کے قریب واقع المٹی ڈیم میں کپڑے دھورہی تھی اس دوران ساتھ ہی بیٹا بھی کھیل رہا تھا۔

کھیلتے کھیلتے اچانک اس کا بیٹا ناگیش ڈیم میں گرکر ڈوبنے لگا تو ماں انجنا نے اسے بچانے کی کوشش میں ندی میں چھلانگ لگادی، مگر بیٹے کو بچانے کی کوشش میں وہ خود بھی لہروں کی نذر ہوگئی۔

مقامی لوگوں نے اپنی مدد آپ کے تحت دونوں ماں بیٹے کی نعشیں ڈیم سے نکال لیں، واقعے کے بعد پورے شہر میں تہوار کی خوشی ماتم میں تبدیل ہوگئی ہے۔ نیڈاگونڈی پولیس نے واقعے کا مقدمہ درج کرلیا ہے۔

Comments

یہ بھی پڑھیں