نئی دہلی : بھارت میں ٹریفک حادثے میں چار افراد کی ہلاکت کے بعد ڈرائیور کی تین دن پرانی لاش درخت سے لٹکی ہوئی ملی، پولیس کا کہنا ہے کہ متوفی نے خود کشی کی۔
تفصیلات کے مطابق بھارتی ریاست ریاست راجستھان کے ضلع پالی میں 21 ستمبر کو ضلع احمد آباد کے علاقہ گوڑا اینڈلہ پولیس اسٹیشن سے گزرنے والے پالی، احمد آباد شاہراہ پر ایک سڑک حادثے کے بعد اب اسی جگہ سے کچھ فاصلے پر ایک منی ٹرک ڈرائیور کی تین دن پرانی لاش برآمد ہوئی ہے۔
بھارتی میڈیا کی رپورٹس میں بتایا گیا ہے کہ حادثے کے مقام کے قریب ڈرائیور نے پھانسی لگا کر خودکشی کرلی ہے، وہاں سے گزرنے والے چرواہوں نے لاش کو دیکھ کر پولیس کو اطلاع دی، جس کے بعد پولیس موقع پرپہنچ گئی اور پوسٹ مارٹم کیلئے لاش کو بانگر ہسپتال منتقل کردیا گیا۔
پولیس کے مطابق مرنے والے شخص کی شناخت ہریانہ کے ضلع گڑگاؤں کے بلاس پور علاقے میں سِدراولی کے رہنے والے50 برس کے ستیش سنگھ ولد ہری سنگھ کے نام سے ہوئی ہے۔
واضح رہے کہ 21 ستمبر کو ضلع پالی کے تڑکے گڑا اینڈلا پولیس سٹیشن کے علاقے نیشنل ہائی وے پر کیروا گاؤں کے پاس ایک منی ٹرک الٹ گیا تھا اس حادثے میں منی ٹرک میں سوار ایک اور چھ سالہ بچی سمیت دو خواتین موقع پر ہی ہلاک ہوگئی تھیں۔ یہ وہی منی ٹرک ڈرائیور تھا جس منی ٹرک کے پلٹ جانے سے ایک ہی خاندان کے چار افراد کی موت ہوگئی تھی۔
بتایا جارہا ہے کہ حادثے کے بعد ٹرک ڈرائیور ستیش سنگھ موقع سے فرار ہوگیا تھا، پولیس نے اسے ڈھونڈنے کی کوشش کی لیکن اس کا کوئی سراغ نہیں ملا اور جمعرات کی شام اسی منی ٹرک ڈرائیور کی تین دن پرانی لاش موقع واردات سے کچھ فاصلے پر ایک درخت سے لٹکی ہوئی ملی۔
پولیس نے خودکشی کے معاملے میں کیس درج کرکے ہلاک ہونے والے شخص کے اہل خانہ کو اس بات کی اطلاع دے دی ہے۔
