بھارت اور نیپال کے درمیان سرحد کو آج سے بند کر دیا گیا ہے جو تین روز تک بند رہے گی اور اس کی وجہ ہے لوک سبھا کے انتخابات۔
بھارتی میڈیا کے مطابق لوک سبھا کے انتخابات کے پہلے مرحلے میں ریاست اتراکھنڈ میں 19 اپریل کو ووٹنگ ہونی ہے۔ الیکشن کے پیش نظر اتراکھنڈ سے متصل بھارت نیپال بین الاقوامی سرحد آج (منگل) 16 اپریل سے بند رہے گی۔ سرحد کی تین روزہ بندش کے دوران یہاں ہر قسم کی نقل وحرکت پر پابندی ہوگی۔
عام انتخابات کے پیش نظر مذکورہ بین الاقوامی سرحد بند کرنے کا فیصلہ 19 مارچ ہونے والی ہندوستان اور نیپال رابطہ کمیٹی کی میٹنگ میں کیا گیا تھا جس کے بعد الیکشن کمیشن کی جانب سے متعلقہ حکام کو سرحد بند کرنے کے احکامات جاری کیے گئے تھے۔
اس فیصلے کے تحت بھارت نیپال بین الاقوامی سرحد آج شام 5 بجے بند کی جائے گی اور 19 اپریل کو ووٹنگ کا عمل مکمل ہونے کے بعد شام 5 بجے دوبارہ کھول دی جائے گی۔ اس دوران سرحد پر حفاظتی انتظامات سخت رہیں گے اور کسی قسم کی نقل و حرکت نہیں ہوگی۔
چمپاوت کے ضلع الیکشن آفیسر نونیت پانڈے کے مطابق، سیکورٹی فورس (ایس ایس بی) 57ویں کور کے کمانڈنٹ کو میڈیکل ایمرجنسی کے لیے اختیار دیا گیا ہے اور ڈپٹی ڈسٹرکٹ مجسٹریٹ پورنگیری، ٹنک پور اور پولیس ایریا آفیسر ٹنک پور کو دیگر کاموں کے لیے اختیار دیا گیا ہے۔
واضح رہے کہ ریاست اتراکھنڈ میں لوک سبھا انتخابات کے لیے امیدواروں کی انتخابی مہم کل (بدھ) 17 اپریل کی شام 5 بجے ختم ہو جائے گی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں