نئی دہلی: بھارت نے نوبل انعام یافتہ مدر ٹریسا کے فلاحی ادارے کی غیر ملکی فنڈنگ پر پابندی لگا دی ہے۔
تفصیلات کے مطابق بھارت نے مدر ٹریسا کے خیراتی ادارے کے لیے غیر ملکی فنڈنگ کو روک دیا، مشنریز آف چیریٹی کے غیر ملکی فنڈز کو روکنے کا یہ اقدام ہندو انتہا پسند گروپس کی جانب سے کرسمس کی تقریبات میں خلل ڈالنے کے بعد سامنے آیا ہے۔
بھارت میں انتہا پسندی کی لپیٹ میں مسلمانوں کے ساتھ اب مسیحی برادری بھی آگئی ہے، مودی حکومت نے خیراتی ادارے کے لیے غیر ملکی فنڈنگ لائسنس کی تجدید کرنے سے انکار کر دیا، اس تنظیم کے تحت ہزاروں ورکرز (ننز) کام کر رہی ہیں جو لاوارث بچوں کے لیے گھر، اسکول، کلینک اور اسپتال جیسے منصوبوں کی نگرانی کرتی ہیں۔
کرسمس کے دن بھارت کی وزارت داخلہ نے اعلان کیا کہ غلط معلومات کی وجہ سے دوبارہ رجسٹریشن نہیں کی جا رہی، بتایا گیا کہ کیتھولک تنظیم مقامی قوانین کے تحت شرائط کو پورا نہیں کرتی۔ اس اقدام سے غریبوں کے لیے پناہ گاہیں چلانے والے سب سے نمایاں ادارے کو دھچکا لگا ہے۔
وضح رہے کہ ہندو انتہا پسند طویل عرصے سے چیریٹی پر الزام لگاتے رہے ہیں کہ وہ اپنے پروگرامز کو لوگوں کو عیسائی بنانے کے لیے استعمال کر رہی ہے، تاہم ادارے کی جانب سے ان تمام الزامات کی تردید کی جا چکی ہے۔
دی مشنریز آف چیریٹی کی بنیاد 1950 میں مدر ٹریسا نے رکھی تھی، جو ایک رومن کیتھولک تھیں جنھوں نے اپنی زندگی کا بیش تر حصہ کلکتہ میں سماجی کاموں میں گزارا۔
