نئی دہلی: بھارت کے جنگی جنون نے جنوبی ایشیا کا امن داؤ پر لگادیا ہے، بھارت نے امریکا کے ساتھ ہتھیاروں کی خریداری کے نئے معاہدے کرلیے۔
تفصیلات کے مطابق امریکی وزیر خارجہ مائیک پومپیو اور وزیر دفاع جیمس میٹس کی بھارتی وزراء کے ساتھ ملاقات کے بعد حساس دفاعی سازو سامان اور امریکی ٹیکنالوجی بھارت کو دینے کی راہ ہموار ہوگئی ہے اور بھارت جنگی ہتھیار خریدنے والا سب سے بڑؑا ملک بن گیا ہے۔
واضح رہے کہ سرحدوں پر بھارت کی پاکستانی آبادیوں پر گولہ باری کسی سے ڈھکی چھپی نہیں ہے، کشمیر میں بھی ظلم و ستم جدید ہتھیاروں کی خریداری بھارت کے جنگی جنون کو ہوا دے گا۔
برطانوی میڈیا کے مطابق گزشتہ دس برسوں میں بھارت جنگی ہتھیار خریدنے والا سب سے بڑا ملک بن چکا ہے۔
بھارتی وزیر خارجہ سشما سوراج نے کہا کہ ہم سرحد پار دہشت گردی کی حمایت پر پاکستانی کی پالیسی کے خلاف امریکی موقف کی حمایت کرتے ہیں، ان کا کہنا تھا کہ بھارت امریکی صدر ٹرمپ کی افغان پالیسی کی بھی حمایت کرتا ہے۔
بھارتی وزیر دفاع نے کہا کہ ہم دہشت گردی کے خلاف اور سلامتی کونسل کو درپیش چیلنجز کا ایک دوسرے سے مل کر مقابلہ کریں گے، اس سلسلے میں دونوں ملکوں نے ہدف حاصل کرنے کے طریقہ کار پر بھی تبادلہ خیال کیا ہے۔
خیال رہے کہ پچھلے چند برسوں میں بھارت اور امریکا کے درمیان دفاعی پالیسی مستحکم ہوئی ہے، دریں اثناء امریکی وزیر خارجہ اور امریکی وزیر دفاع نے بھارتی وزیراعظم نریندر مودی سے بھی ملاقات کی۔
