The news is by your side.

Advertisement

بھارت: ٹی وی اداکارہ کی خود کشی

پریکشا مہتا کا پہلا ڈراما سعادت حسن منٹو کے افسانے کھول دو پر مبنی تھا، جس سے اداکارہ نے شہرت حاصل کی

ممبئی: بھارتی ٹی وی سیریل میں کام کرنے والی ایک اداکارہ نے خود کشی کر لی۔

غیر ملکی میڈیا کے مطابق بھارتی ریاست مدھیہ پردیش کے شہر اندور کی رہنے والی اور ممبئی میں متعدد ٹی وی سیریلز میں کام کرنے والی اداکارہ پریکشا مہتا نے خود کشی کر لی۔

میڈیا رپورٹس میں کہا گیا ہے کہ 25 سالہ اداکارہ ذہنی دباؤ میں تھی، اور کرونا وائرس کی روک تھام کے لیے نافذ لاک ڈاؤن کی وجہ سے کام نہ ملنے پر پریشانی کا شکار تھی۔

اندور پولیس نے واقعے کا مقدمہ درج کر کے مزید تفتیش شروع کر دی ہے، پولیس موت کی درست وجہ جاننے کی کوشش کر رہی ہے کہ آیا اداکارہ نے کیریئر کی وجہ سے خود کشی کی یا کسی اور وجہ سے۔

دوسری طرف سیریل کرائم پیٹرول کی اداکارہ پریکشا مہتا کی فیملی نے یہی خدشہ ظاہر کیا ہے کہ کام نہ ملنے کی وجہ سے اداکارہ انتہائی قدم اٹھانے پر مجبور ہوئی۔ پولیس کا کہنا تھا کہ یہ واقعہ اندور کے ہیرا نگر پولیس اسٹیشن کے علاقے بجرنگ نگر میں پیش آیا، اداکارہ نے رات گئے گلے میں پھندا لگا کر جان دی۔

اداکارہ کے والد نے میڈیا کو بتایا کہ ممبئی میں وہ ایک ٹی وی سیریل میں کام کر رہی تھی، اس دوران لاک ڈاؤن ہوا اور اسے کام چھوڑ کر گھر آنا پڑا، جیسا کہ ممبئی میں کرونا وائرس کے مریضوں کی تعداد بڑھتی جا رہی ہے اور لاک ڈاؤن مسلسل جاری رکھا جا رہا ہے، امکان ہے وہ اس سے ڈپریشن میں آ گئی تھی۔

اداکارہ پریکشا مہتا نے سب سے پہلے ڈراما کلاسک افسانہ نویس سعادت حسن منٹو کے ڈرامے ‘کھول دو’ میں کام کیا تھا، جس سے اس نے زبردست پذیرائی حاصل کی، اس کے بعد اس نے متعدد اہم ڈراموں میں کام کیا، کئی ایوارڈ بھی جیتے۔

Comments

یہ بھی پڑھیں