جونپور : بھارتی ریاست اتر پردیش کے شہر جونپور میں ضلع مجسٹریٹ کے دفتر کے سامنے واقع بینک میں جعلسازی کا ایک واقعہ سامنے آیا ہے۔
ضلع بنارس کی مقامی کمپنی کا رکن جونپور کے تاجر رہنما صدام حسین کو قرضہ دینے کی غرض سے 20 جنوری کو ان کی دکان پر آیا۔
قرضہ کی کاغذی کارروائی مکمل کرنے کے لئے اس شخص نے تاجر رہنما سے چند ضروری کاغذات کا مطالبہ کیا اور ساتھ ہی ایک کینسل (منسوخ شدہ) چیک بھی مع دستخط کے طلب کیا۔
اس شخص کو کینسل چیک اور دستاویز مہیا کرنے کے بعد اگلے ہی روز 21 جنوری کو منسوخ شدہ چیک کے ذریعے کھاتے سے جعل سازی کرکے اس کارکن نے کھاتے سے95 ہزار5سو روپے نکلوا لیے۔
موبائل میسج کے ذریعہ سے معلومات حاصل ہونے کے بعد تاجر نے بینک سے رابطہ کیا تو پوری حقیقت سامنے آگئی۔
میڈیا سے بات کرتے ہوئے متاثرہ تاجر صدام حسین نے بینک عملے پر الزام عائد کرتے ہوئے کہا کہ یہ کام بینک کی ملی بھگت کی وجہ سے عمل میں آیا ہے۔
انہوں نے مزید کہا کہ وہ یہ چاہتے ہیں کہ پولیس ان کی مدد کرے اور ٹرانزکشن شدہ پیسے واپس دلوائے، اب کاروباری رہنما صدام حسین مدد و انصاف کی تلاش میں بینک کا چکر کاٹ رہے ہیں۔
