راولپنڈی: بھارتی فوج نے لائن آف کنٹرول کی خلاف ورزی کرتے ہوئے چارواہ، ہرپال سیکٹر پر بلااشتعال فائرنگ اور گولہ باری کی، مکان کی چھت پر گولہ گرنے سے دو خواتین سمیت چار شہری شہید جبکہ 4 افراد زخمی ہوگئے، پنجاب رینجرزکی مؤثرجوابی کارروائی میں کئی بھارتی مورچےتباہ ہوگئے۔
پاک فوج کے شعبہ تعلقات عامہ آئی ایس پی آر کے مطابق بھارتی فوج نے ایک بار پھر اپنی روایتی ہٹ دھرمی کا مظاہرہ کرتے ہوئے پاک بھارت سرحد پر بلااشتعال فائرنگ کی ہے، جس کے نتیجے میں دو خواتین سمیت چار شہری شہید جبکہ چار افراد زخمی ہوگئے۔
بھارتی فوج نے سیز فائر کی خلاف ورزی کرتے ہوئے چارواہ، ہرپال سیکٹر پر بلااشتعال فائرنگ اور گولہ باری کی، اسسٹنٹ کمشنر ظہیر لیاقت نے کہا ہے کہ بھارتی فوج کی جانب سے فائرکیا گیا مارٹرگولہ ایک مکان کی چھت پر جا گرا۔
مارٹرگولہ گرنے سے چھت پر موجود 8 افراد زخمی ہوگئے، جنہیں طبی امداد کے لیے مقامی اسپتال پہنچایا گیا، جہاں 4 افراد زخموں کی تاب نہ لاتے ہوئے جاں بحق ہوگئے۔
اسسٹنٹ کمشنر کا کہنا ہے کہ بھارتی بلا اشتعال فائرنگ اور گولہ باری کے باعث اسکول غیرمعینہ مدت کے لیے بند کردیا گیا ہے۔
علاقے میں خوف وہراس کے باعث لوگوں نے نقل مکانی شروع کردی، انہوں نے بتایا کہ ضلعی حکومت کی جانب سے سبزپیر، پنڈی بھاگو اور چوبارہ میں ریلیف کیمپ قائم کردیئے گئے ہیں۔
وزیراعظم شاہد خاقان عباسی کا شہداء کے لواحقین سے اظہار افسوس
وزیراعظم شاہد خاقان عباسی نے ایل اوسی پر بھارتی فائرنگ کی شدید مذمت کرتے ہوئے اپنے غم و غصے کا اظہار کیا ہے، نیو یارک سے جاری اپنے بیان میں انہوں نے بھارتی فوج کی فائرنگ سے شہید ہونیوالوں کے ورثاء سے افسوس کا اظہار بھی کیا۔
